आपत्कालीन परिस्थितीत जीव वाचवण्यासाठी प्रत्येकाला प्रथमोपचाराची माहिती असणे ही काळाची गरज आहे. या पार्श्वभूमीवर बेळगावमधील संगोळी रायण्‍णा प्रथम श्रेणी महाविद्यालयात भारतीय रेडक्रॉस संस्थेच्या वतीने विशेष जनजागृती कार्यक्रमाचे आयोजन करण्यात आले होते.

भारतीय रेडक्रॉस संस्थेच्या वतीने आयोजित या कार्यक्रमात प्रथमोपचार, रक्तदान, कर्करोग आणि संसर्गजन्य रोगांबाबत सविस्तर मार्गदर्शन करण्यात आले. मुख्य व्याख्याते डॉ. देवेगौडा यांनी अपघाताच्या वेळी किंवा आणीबाणीच्या प्रसंगी युवकांनी धैर्याने पुढे येऊन प्रथमोपचार केल्यास मृत्यूचे प्रमाण कमी करता येईल, असे सांगितले. गोव्यात प्रथमोपचार न मिळाल्याने आपल्या नातेवाईकाला गमवावे लागल्याचे उदाहरण देत, जीव वाचवण्यापेक्षा मोठी सेवा दुसरी कोणतीही नाही, असे त्यांनी स्पष्ट केले. महाविद्यालयाचे प्राचार्य एस. सी. पाटील यांनी कठीण प्रसंगात रक्तदान आणि मदतीद्वारे समाजाला आधार देण्याचे आवाहन विद्यार्थ्यांना केले.

कार्यक्रमाचे अध्यक्ष आणि रेडक्रॉसचे जिल्हाध्यक्ष डॉ. व्ही. डी. डांगे यांनी संस्थेचा इतिहास आणि पूरपरिस्थितीसारख्या संकटात विविध विभागांच्या समन्वयाने आरोग्य रक्षण केल्याचे अनुभव मांडले. रेडक्रॉस अधिकारी डॉ. दैवति गस्ती यांनी मानवतेच्या दृष्टीने युवकांनी अशा प्रशिक्षणात सक्रिय व्हावे, अशी विनंती केली. या प्रसंगी अशोक बादामी, निवृत्त लेफ्टनंट कर्नल विनोदिनी शर्मा, प्रवीण हिरेमठ, एस. जी. सिदनाळ, डॉ. डी. एन. मिसाळे, मूलिमनी, प्रियांका पुराणिक, सुजाता पै, महांतेश हिरेमठ, सुनील, सुनीता मुडलगी, भुवनेश्वरी पाटील आणि नीना कारजगी उपस्थित होते.