श्रीशैल मल्लिकार्जुन देवाचे दर्शन घेऊन गावी परतत असताना क्रूझर आणि ट्रकची समोरासमोर भीषण धडक झाली. आंध्र प्रदेशातील मार्कपुरम जिल्ह्यातील तिप्पायपालेम जवळ सोमवारी झालेल्या या अपघातात चिक्कोडीमधील तीन भाविकांचा जागीच मृत्यू झाला आहे.

या अपघातात चिक्कोडी तालुक्यातील एकसंबा येथील रहिवासी असलेले अजित सातवारा (वय २८), गौरव (वय ४०) आणि अलका शिंदे (वय ६०) अशी मृतांची नावे आहेत. एकसंबा येथून एकूण १४ भाविक क्रूझर गाडीने श्रीशैल मल्लिकार्जुन देवाच्या दर्शनासाठी गेले होते. दर्शन आटोपून परतत असताना ही दुर्घटना घडली.

मार्कपुरम जिल्ह्यातील तिप्पायपालेम जवळ कर्नूलहून नलगोंडाकडे केळी घेऊन जाणाऱ्या ट्रकने भाविकांच्या क्रूझरला जोरदार धडक दिली. ही धडक इतकी भीषण होती की, क्रूझरमधील तीन जणांचा जागीच प्राण गेला.

अपघातात अन्य चार भाविक गंभीर जखमी झाले असून, त्यांना उपचारासाठी नंद्याल येथील खासगी रुग्णालयात दाखल करण्यात आले आहे, अशी माहिती मार्कपुरमचे वर्तुळ निरीक्षक पी. सुब्बाराव यांनी दिली.