बेळगाव जिल्ह्यातील कित्तूर तालुक्यातील निच्चनक्की गावात काल संध्याकाळी झालेल्या मुसळधार पावसामुळे जनजीवन विस्कळीत झाले आहे. पावसाच्या पाण्यासोबतच सांडपाणी रस्त्यांवरून वाहत असल्याने ग्रामस्थांना चालणेही कठीण झाले असून प्रशासनाविरोधात संताप व्यक्त होत आहे.

निच्चनक्की गावात पावसाचा जोर वाढल्याने ठिकठिकाणी पाणी साचले आहे. गावात योग्य सांडपाणी व्यवस्था नसल्याने पावसाचे पाणी निचरा होण्याऐवजी सांडपाण्यासह थेट रस्त्यावर आले आहे. यामुळे रस्त्यांना गटाराचे स्वरूप प्राप्त झाले असून सर्वत्र दुर्गंधी पसरली आहे. चिखल आणि घाणीच्या साम्राज्यामुळे पादचारी तसेच वाहनधारकांना मोठा त्रास सहन करावा लागत आहे.

पावसाळा सुरू होण्यापूर्वी गटारे आणि सांडपाण्याची कुंडे साफ करणे आवश्यक होते, मात्र ग्रामपंचायत अधिकाऱ्यांनी याकडे दुर्लक्ष केल्याचा आरोप ग्रामस्थांनी केला आहे. प्रशासनाने अद्याप कोणतीही पावले न उचलल्याने नागरिकांनी संताप व्यक्त केला असून ही समस्या तत्काळ सोडवण्याची मागणी केली आहे. आता तरी संबंधित अधिकारी जागे होऊन यावर कायमस्वरूपी तोडगा काढणार का, याकडे सर्वांचे लक्ष लागले आहे.