बेळगाव उत्तर विधानसभा मतदारसंघाचे आमदार आसिफ सेठ यांनी आज रामनगर भागात भेट देऊन पाहणी केली. केवळ आश्वासने न देता थेट नागरिकांच्या दारात जाऊन स्थानिक समस्या जाणून घेतल्याने या दौऱ्याची चर्चा होत आहे.

रामनगरमधील विविध गल्ल्यांमध्ये फिरून आमदार आसिफ सेठ यांनी नागरिकांशी संवाद साधला. पिण्याचे पाणी, सांडपाणी व्यवस्था आणि रस्त्यांची दुरवस्था यांची त्यांनी स्वतः पाहणी करून स्थानिकांच्या अडचणी समजून घेतल्या. आमदारांच्या या भेटीत रहिवाशांनी गेल्या अनेक दशकांपासून भेडसावणाऱ्या समस्या मांडल्या. जनतेच्या समस्या समजून घेण्यासाठी प्रशासकीय अहवालांपेक्षा जनतेशी असलेला थेट संपर्क अधिक महत्त्वाचा असल्याचे आसिफ सेठ यांनी यावेळी म्हटले.

या भेटीदरम्यान सार्वजनिक तक्रारींची दखल घेत आमदारांनी रामनगरमधील पायाभूत सुविधांना प्राधान्य देऊन विकास करण्याचे आश्वासन दिले. नागरिकांनी मांडलेली प्रत्येक समस्या गांभीर्याने घेतली जाईल आणि लवकरच संबंधित विभागांमार्फत कामांना सुरुवात केली जाईल, अशी ग्वाही आसिफ सेठ यांनी दिली. लोकप्रतिनिधीने स्वतः भागात येऊन समस्या जाणून घेतल्याबद्दल स्थानिक रहिवाशांनी समाधान व्यक्त केले.