रामदुर्ग तालुका आरोग्य अधिकारी कार्यालय आणि पोलीस विभाग यांच्या संयुक्त विद्यमाने गुरुवारी तंबाखू सेवनाचे दुष्परिणाम आणि ‘कोटपा-२००३’ कायद्याबाबत प्रशिक्षण कार्यशाळेचे आयोजन करण्यात आले होते.

कार्यक्रमाचे मुख्य अतिथी सीपीआय विनायक बडिगेर यांनी दुकानदारांना कोटपा कायद्याचे काटेकोर पालन करण्याचे आवाहन केले. यावेळी तंबाखू विक्री करणाऱ्या दुकानदारांना कायद्यातील तरतुदींबाबत सविस्तर माहिती देऊन सतर्क करण्यात आले. तंबाखू विक्री करताना नियमांचे उल्लंघन होणार नाही याची काळजी घेण्याच्या सूचना त्यांनी यावेळी दिल्या.

तंबाखू सेवनामुळे कॅन्सर, गँगरीन आणि हृदयविकारासारखे गंभीर आजार जडतात, असे जिल्हा सल्लागार डॉ. श्वेता पाटील यांनी स्पष्ट केले. सार्वजनिक ठिकाणी धूम्रपान केल्यास १ हजार रुपये दंड, २१ वर्षांखालील तरुणांना तंबाखू विक्रीवर बंदी आणि शैक्षणिक संस्थांपासून १०० मीटर अंतरात विक्री करणे हा गुन्हा असल्याचे त्यांनी नमूद केले. तसेच सुट्टे सिगारेट विकणे देखील कायद्याने गुन्हा असल्याचे त्यांनी सांगितले.

नियमबाह्य पद्धतीने तंबाखूजन्य पदार्थांची विक्री केल्यास दंड आणि कायदेशीर कारवाई केली जाईल, असा इशारा तालुका आरोग्य अधिकारी डॉ. नवीन निजगुली यांनी दिला. तंबाखू विक्रीसाठी स्वतंत्र परवाना घेणे आवश्यक असल्याचेही त्यांनी यावेळी स्पष्ट केले.

जिल्हा तंबाखू व्यसनमुक्ती केंद्रात उपलब्ध असणाऱ्या सोयीसुविधांबाबत कविता राजन्नवर यांनी उपस्थितांना माहिती दिली. या कार्यशाळेला विविध विभागांचे प्रमुख आणि तंबाखू विक्रेते मोठ्या संख्येने उपस्थित होते.