गेल्या काही दिवसांपासून बागलकोट शहरात सुरू असलेल्या ‘धर्म दंगल’ वादाच्या पार्श्वभूमीवर, आज कडक पोलीस बंदोबस्तात होळी उत्सवातील पारंपरिक ‘बंडी’अर्थात गाडा मिरवणूक उत्साहात पार पडली.

संवेदनशील मार्गावरूनच या मिरवणुकीला प्रारंभ झाला. शेकडो तरुणांच्या सहभागाने ही मिरवणूक रंगात न्हाऊन निघाली होती. मात्र, मिरवणूक जेव्हा पंका मशिदीसमोर पोहोचली, तेव्हा परिस्थिती काहीशी गंभीर झाली होती. यावेळी मिरवणुकीत सहभागी तरुणांनी ‘जय शिवाजी, जय भवानी’ अशा घोषणांचा मोठा जयघोष केला. मशिदीसमोर झालेल्या या घोषणाबाजीमुळे वातावरणात तणाव निर्माण झाला होता, मात्र तैनात असलेल्या पोलिसांनी तातडीने हस्तक्षेप करत परिस्थिती नियंत्रणात आणली.

कोणतीही अनुचित घटना घडू नये यासाठी गृह विभागाने मोठी खबरदारी घेतली आहे. पोलीस अधीक्षक सिद्धार्थ गोयल आणि माजी पोलीस अधीक्षक अमरनाथ रेड्डी यांच्या नेतृत्वाखाली संपूर्ण शहरात पोलिसांचा कडक पहारा ठेवण्यात आला आहे. संवेदनशील भागांमध्ये वरिष्ठ पोलीस अधिकारी स्वतः तळ ठोकून आहेत. सध्या संपूर्ण शहराला पोलीस छावणीचे स्वरूप आले असून, नागरिकांनी शांतता राखून सण साजरा करावा, असे आवाहन प्रशासनाकडून करण्यात आले आहे.