इराण-इस्रायल युद्धाच्या पार्श्वभूमीवर आखाती देशांमध्ये संकटात सापडलेल्या एक लाखांहून अधिक भारतीयांना आणि सर्व राज्यातील जनतेला सुरक्षितपणे मायदेशी आणण्यासाठी राज्य व केंद्र सरकार सज्ज आहे, अशी ग्वाही विजापूर जिल्ह्याचे पालकमंत्री एम.बी. पाटील यांनी दिली.

जगात कुठेही भारतीय नागरिक संकटात सापडतात, तेव्हा केंद्र आणि राज्य सरकारने त्यांना नेहमीच सुरक्षित बाहेर काढले आहे. यापूर्वी युक्रेन युद्धात अडकलेल्या आपल्या नागरिकांना आपण सुखरूप परत आणले होते. भारतीय नागरिक कुठेही असले, तरी त्यांच्या सुरक्षेला केंद्र सरकारचे प्रथम प्राधान्य असते, असे मंत्री एम.बी. पाटील यांनी स्पष्ट केले. इराण-इस्रायलमधील भीषण युद्धामुळे आखाती देशांत राहणाऱ्या नागरिकांसमोर मोठे संकट उभे ठाकले आहे. यासंदर्भात वरिष्ठ स्तरावर चर्चा झाली असून, अडकलेल्यांच्या बचावासाठी आवश्यक ती सर्व पावले उचलली जात आहेत.

विशेषतः विजापूर जिल्ह्यातील चार तरुण सध्या दुबईत अडकून पडल्याची माहिती समोर आली आहे. या सर्वांना लवकरात लवकर आणि सुरक्षितपणे मायदेशी आणण्याचे आश्वासनही पालकमंत्र्यांनी यावेळी दिले. युद्धाच्या या कठीण काळात नागरिकांनी आणि त्यांच्या कुटुंबीयांनी घाबरून न जाता संयम ठेवावा, सरकार पूर्ण ताकदीने त्यांच्या पाठीशी आहे, असेही त्यांनी नमूद केले.