बेळगाव उत्तरचे आमदार आसिफ सेठ यांनी आज वृंदावन कॉलनी, शिंदोळी रोड आणि बसवण कुडची या भागांचा दौरा केला. यावेळी त्यांनी विविध विकासकामांची पाहणी करून स्थानिक नागरिकांच्या समस्या जाणून घेण्यासाठी ‘जनता दरबार’ आयोजित केला होता.

मतदारसंघातील प्रलंबित कामे आणि नागरिकांना येणाऱ्या अडचणी समजून घेण्यासाठी आमदार आसिफ सेठ यांनी आज विविध भागांना भेटी दिल्या. यावेळी रस्ते, गटार व्यवस्था, पिण्याचे पाणी आणि स्वच्छतेबाबत नागरिकांनी तक्रारी मांडल्या. आमदारांनी या समस्यांची नोंद घेत उपस्थित अधिकाऱ्यांशी चर्चा केली आणि या कामांना प्राधान्य देण्याचे निर्देश दिले.

यावेळी बोलताना आमदार म्हणाले की, नागरिकांच्या समस्या थेट जाणून घेतल्यामुळे प्रशासकीय कामात पारदर्शकता येते. जनता दरबारात मांडण्यात आलेले प्रश्न संबंधित विभागामार्फत मार्गी लावण्याचे आश्वासन त्यांनी यावेळी दिले. या भेटीदरम्यान स्थानिक नागरिक आणि विविध विभागांचे अधिकारी उपस्थित होते.