अनेक दशकांपासून समाजाची शांतता आणि सुव्यवस्थेसाठी अहोरात्र झटलेल्या बेळगाव जिल्ह्यातील ज्येष्ठ निवृत्त पोलीस अधिकाऱ्यांचा आज विशेष गौरव करण्यात आला.

बेळगाव जिल्हा निवृत्त पोलीस अधिकारी व्यासपीठाच्या वतीने ८५ वर्षांवरील नऊ ज्येष्ठ साधकांसाठी या सत्कार समारंभाचे आयोजन करण्यात आले होते. बेळगाव येथील पोलीस मुख्यालयाच्या आवारातील श्री सिद्धभ्रदेश्वर मंदिर सभागृहात आज निवृत्त पोलीस अधिकाऱ्यांचा स्नेहमेळावा पार पडला. या कार्यक्रमाचे मुख्य आकर्षण म्हणजे ८५ वर्षांची वयोमर्यादा ओलांडलेल्या नऊ ज्येष्ठ निवृत्त अधिकाऱ्यांचा करण्यात आलेला आत्मीय सत्कार. यामध्ये निवृत्त आयजीपी एस. एस. पावट्ये, निवृत्त एसपी डी. बी. नेत्रेकर यांच्यासह डीएसपी, सीपीआय आणि कॉन्स्टेबल दर्जाच्या निवृत्त कर्मचाऱ्यांचा गौरव करण्यात आला. व्यासपीठाचे अध्यक्ष अशोक एल. सदलगी यांच्या नेतृत्वाखाली पार पडलेल्या या समारंभाचे उद्घाटन उत्तर विभागाचे आयजीपी डॉ. चेतनसिंह राठोड यांनी केले. ज्येष्ठ अधिकाऱ्यांचा अनुभव आणि शिस्त ही आजच्या पिढीसाठी आदर्श असल्याचे त्यांनी यावेळी नमूद केले.

नगर पोलीस आयुक्त भूषण बोरसे यांनी आपली प्रतिक्रिया व्यक्त करताना सांगितले की, पोलीस विभागातील काम हे तणावपूर्ण असते, अशा परिस्थितीत मनःशांती टिकवून ठेवणे अत्यंत महत्त्वाचे आहे. सरकारने सक्रिय सेवेतून निवृत्तीसाठी ६० वर्षांची मर्यादा घातली असली, तरी आयुष्यात शंभर वर्षांहून अधिक काळ आपण सक्रिय राहू शकतो, असा विश्वास त्यांनी व्यक्त केला.

सत्कारमूर्ती निवृत्त एसपी एस. एस. मुरगोड आणि निवृत्त एसपी अशोक सदलगी यांच्यासह अन्य निवृत्त अधिकाऱ्यांनी आपल्या भावना व्यक्त करताना व्यासपीठाचे आभार मानले. पोलीस विभागातील आपली प्रदीर्घ सेवा आणि जुन्या आठवणींना त्यांनी यावेळी उजाळा दिला. याप्रसंगी व्यासपीठाचे सचिव टी. एच. करीकल, उपाध्यक्ष आणि कार्यकारिणी मंडळाच्या सदस्यांनी हा कार्यक्रम यशस्वी करण्यासाठी परिश्रम घेतले. आपल्या जुन्या सहकाऱ्यांना भेटल्याने निवृत्त अधिकाऱ्यांमध्ये उत्साहाचे वातावरण पाहायला मिळाले.