वीरराणी बेलवडी मल्लम्मा या समस्त स्त्री शक्तीसाठी आदर्श असून, त्यांचे कर्तृत्व आणि शौर्य या मातीतील प्रत्येकाने अंगीकारले पाहिजे, असे आवाहन महापौर मंगेश पवार यांनी केले.

शुक्रवारी बेळगावच्या कित्तूर चन्नम्मा चौकात बेलवडी मल्लम्मा यांच्या ‘विजय ज्योती’चे आगमन झाले. या गौरवशाली विजय ज्योतीचे स्वागत करताना महापौर बोलत होते. छत्रपती शिवाजी महाराजांच्या प्रशंसेला पात्र ठरलेल्या मल्लम्मा यांचा पराक्रम इतिहासात सुवर्ण अक्षरांनी लिहिला गेला आहे. भाषाभेद विसरून आदर्श प्रशासन कसे असावे, याचे मूर्तिमंत उदाहरण म्हणजे बेलवಡಿ मल्लम्मा आणि छत्रपती शिवाजी महाराज हे आहेत, असेही महापौरांनी यावेळी नमूद केले.

“राणी मल्लम्मा यांचा इतिहास आपल्याला अन्यायाविरुद्ध लढण्याची आणि स्वाभिमानाने जगण्याची प्रेरणा देतो,” असे महापौर मंगेश पवार यांनी म्हटले.

ही विजय ज्योती खानापूर येथून निघाली असून बेळगावच्या चन्नम्मा चौकात तिचे भव्य स्वागत करण्यात आले. त्यानंतर ही ज्योती पुढील प्रवासासाठी बेलवडीकडे रवाना झाली. या ऐतिहासिक सोहळ्यासाठी बेळगावमधील नागरिक मोठ्या संख्येने उपस्थित होते.

याप्रसंगी कन्नड आणि संस्कृती विभागाच्या उपसंचालिका विद्यावती भजंत्री, कस्तुरी भावी यांच्यासह अन्य मान्यवर उपस्थित होते.

बेलवडी येथे होणाऱ्या मुख्य सोहळ्यासाठी या ज्योतीचे स्वागत करण्याची जय्यत तयारी करण्यात आली आहे.