बेळगाव जिल्ह्यातील कागवाड तालुक्यातील शेडबाळ येथे श्री बसवण्णा देवाची यात्रा मोठ्या थाटामाटात साजरी झाली. कर्नाटक आणि महाराष्ट्राच्या सीमाभागात प्रसिद्ध असलेल्या या रथोत्सवात हजारो भाविकांनी सहभागी होऊन दर्शनाचा लाभ घेतला.

कर्नाटक आणि महाराष्ट्र राज्यांच्या सीमेवर वसलेल्या ऐतिहासिक शेडबाळ गावातील १२ व्या शतकातील श्री बसवण्णा देवाची यात्रा अत्यंत भक्तीभावाने पार पडली. यात्रेचे मुख्य आकर्षण असलेल्या रथोत्सवावेळी भाविकांनी सुमारे ३ टन वजनाचा भव्य रथ हाताने ओढून आपली श्रद्धा अर्पण केली. शेकडो वर्षांची परंपरा लाभलेली ही यात्रा दरवर्षीप्रमाणे यंदाही सर्व समाजाच्या भाविकांनी एकत्र येत एकोप्याने साजरी केली. मंदिराचे अर्चक गुरव बंधू यांनी मंदिरात विशेष पूजा आणि विविध धार्मिक विधी पार पाडले.

रविवारी सायंकाळी अश्विनी नक्षत्राच्या शुभ मुहूर्तावर रथोत्सवाला प्रारंभ झाला. हा अभूतपूर्व सोहळा पाहण्यासाठी गावातील तसेच परिसरातील हजारो भाविकांनी गर्दी केली होती. देवस्थान समितीचे अध्यक्ष अशोक पाटील, वर्धमान पाटील, अतीकांत पाटील, सुनील पाटील, अश्वथ पाटील आणि डॉ. अशोक पाटील यांच्या नेतृत्वाखाली हा रथोत्सव यशस्वीपणे संपन्न झाला. रथोत्सव कोणत्याही अडथळ्याविना पार पडल्याने गावात सुख-समृद्धी नांदेल, अशी भावना ज्येष्ठ नागरिकांनी व्यक्त केली. कागवाडचे पीएसआय राघवेंद्र खोत यांच्या मार्गदर्शनाखाली यात्रेसाठी चोख पोलीस बंदोबस्त ठेवण्यात आला होता.