​बागलकोट जिल्ह्यातील जमखंडी शहराबाहेर मध्यरात्री एक भीषण अपघात घडला. चालकाचे नियंत्रण सुटल्याने ट्रॅक्टर रस्त्याशेजारील खोल दरीत कोसळला असून, यात दोन वर्षांच्या बालकासह चार जणांचा जागीच मृत्यू झाला आहे.

​जमखंडी-मुधोळ रस्त्यावर झालेल्या या अपघातातील सर्व मृत हे महाराष्ट्रातील यवतमाळ जिल्ह्यातील गुप्तवाडा येथील ऊसतोड कामगार आहेत. मुधोळहून जमखंडीकडे जाणाऱ्या या ट्रॅक्टरमध्ये सुमारे २० मजूर प्रवास करत होते. ट्रॅक्टर अचानक उलटल्याने २३ वर्षीय मनुष, २७ वर्षीय लक्ष्मी, २८ वर्षीय रेखा आणि दोन वर्षांचा बालक हलकी यांचा जागीच प्राण गेला. या अपघातात इतर ८ मजूर गंभीर जखमी झाले असून, त्यांना उपचारासाठी जमखंडी येथील शासकीय रुग्णालयात दाखल करण्यात आले आहे.

​घटनेची माहिती मिळताच जमखंडी शहर पोलीस ठाण्याच्या पोलीस उपनिरीक्षकांनी तातडीने घटनास्थळी धाव घेत पाहणी केली. दरीत कोसळलेला ट्रॅक्टर क्रेनच्या साहाय्याने बाहेर काढण्यात आला आहे.

ऊसतोडणीसाठी आलेल्या या मजुरांच्या कुटुंबियांचा आक्रोश हृदय पिळवटून टाकणारा होता.