राज्यातील महाविद्यालये आणि विद्यापीठांमध्ये बोगस पीएचडी उमेदवारांचा सुळसुळाट झाला असून, त्यांच्यावर त्वरित कठोर कारवाई करण्यात यावी, या मागणीसाठी हुबळीत अखिल भारतीय विद्यार्थी परिषदेच्या कार्यकर्त्यांनी जोरदार निदर्शने केली.

हुबळीतील होसूर येथील केएमसीआरआय रुग्णालयासमोर हे आंदोलन करण्यात आले. यावेळी अभाविप कार्यकर्त्यांनी हुबळी पोलीस अधिकाऱ्यांच्या माध्यमातून राज्य सरकारला एक निवेदन सादर केले आहे. राज्यातील विविध शिक्षण संस्थांमध्ये बोगस पीएचडी पदव्यांच्या आधारे मोठ्या प्रमाणावर भ्रष्टाचार सुरू असून, यामुळे खऱ्या गुणवंत उमेदवारांचे नुकसान होत असल्याचे कार्यकर्त्यांनी निदर्शनास आणून दिले.

बोगस पीएचडी उमेदवारांमुळे संपूर्ण शिक्षण व्यवस्थेची प्रतिमा मलिन होत असून, या प्रकरणाची सखोल चौकशी करण्याची मागणी अभाविपच्या वतीने करण्यात आली आहे. पीयूसी, पदवी महाविद्यालये आणि विद्यापीठांसह उच्च शिक्षण विभागात अनेक जण बनावट कागदपत्रांच्या आधारे कार्यरत असल्याचा आरोप आंदोलकांनी केला.

उच्च शिक्षण विभागातील अशा संशयास्पद पीएचडी पदवीधारकांची तातडीने ओळख पटवून त्यांच्यावर कायदेशीर बडगा उगारण्यात यावा, अशी आग्रही मागणी अभाविप कार्यकर्त्यांनी केली.