राज्यातील चारही परिवहन महामंडळांच्या कर्मचाऱ्यांनी पुकारलेल्या ‘बेंगळुरू चलो’ आंदोलनाच्या पार्श्वभूमीवर, वायव्य कर्नाटक राज्य रस्ते परिवहन महामंडळाने प्रवाशांची गैरसोय टाळण्यासाठी कंबर कसली आहे. महामंडळाचे व्यवस्थापकीय संचालक प्रियांग यांनी कर्मचाऱ्यांना कामावर हजर राहण्याचे कडक निर्देश दिले आहेत.

वेतन सुधारणा आणि थकीत देयकांसह विविध मागण्यांसाठी परिवहन कर्मचाऱ्यांनी आंदोलनाचे हत्यार उपसले आहे. या पार्श्वभूमीवर हुबळी येथे पत्रकारांशी बोलताना प्रियांग यांनी स्पष्ट केले की, आंदोलनामुळे बस सेवा विस्कळीत होऊ नये यासाठी सर्व आवश्यक खबरदारी घेण्यात आली आहे. कर्तव्यावर अनुपस्थित राहणाऱ्या कर्मचाऱ्यांचे वेतन कापले जाईल आणि त्यांच्यावर शिस्तभंगाची कारवाई केली जाईल, असा इशारा त्यांनी दिला आहे.

प्रशासनाने सर्व परिवहन अधिकाऱ्यांना गुरुवारी बस वाहतूक सुरळीत ठेवण्याच्या सूचना दिल्या आहेत. वैद्यकीय आणीबाणी किंवा अपरिहार्य कारण असल्याशिवाय कर्मचाऱ्यांना कोणतीही रजा मंजूर करू नका, असे आदेश देण्यात आले आहेत. हे आदेश साप्ताहिक सुट्टी किंवा दीर्घकालीन रजेवर असलेल्यांना लागू नसले तरी, गरज पडल्यास साप्ताहिक सुट्ट्या रद्द करून कर्मचाऱ्यांना पाचारण करण्यात यावे, असे प्रियांग यांनी स्पष्ट केले.

“प्रवाशांना कोणत्याही प्रकारचा त्रास होऊ नये यासाठी महामंडळ सज्ज आहे. कर्मचाऱ्यांनी आंदोलनात सहभागी न होता कर्तव्याला प्राधान्य द्यावे, अन्यथा नियमानुसार कठोर कारवाई केली जाईल,” अशी प्रतिक्रिया प्रियांग यांनी व्यक्त केली.