मोठ्या क्रिकेट स्पर्धांच्या व्यासपीठावर राजकीय नेते किंवा सेलिब्रिटींना मिरवण्याची जुनी परंपरा बेळगावात मोडीत निघाली असून एम.पी. फाऊंडेशनचे अध्यक्ष मुरुगेंद्रगौडा पाटील यांनी आपल्या क्रिकेट स्पर्धेचे मुख्य अतिथी म्हणून रिक्षाचालकांना सन्मानित केले.

सामान्यतः मोठ्या क्रिकेट स्पर्धांच्या व्यासपीठावर राजकीय नेते किंवा चित्रपटसृष्टीतील तारकांची गर्दी असते. मात्र, बेळगावमधील एम.पी. फाऊंडेशनने या परंपरेला छेद देत समाजातील खऱ्या कष्टकऱ्यांचा गौरव केला आहे. उत्तर बेळगावमधील रिक्षाचालकांना मुख्य अतिथी म्हणून सन्मानित करून मुरुगेंद्रगौडा पाटील यांनी एक नवा आदर्श प्रस्थापित केला आहे.

एम.पी. फाऊंडेशनतर्फे आयोजित ‘सीझन-१ ऑल इंडिया टीन्स क्रिकेट टूर्नामेंट’मध्ये काल एक वेगळाच उत्साह पाहायला मिळाला. फाऊंडेशनचे अध्यक्ष मुरुगेंद्रगौडा पाटील यांनी स्वतः पुढाकार घेऊन कणबर्गी आणि परिसरातील रिक्षाचालकांना मैदानावर पाचारण केले. विशेष म्हणजे, कोणत्याही नेत्याची वाट न पाहता या रिक्षाचालकांच्या हस्ते सामन्याचा शुभारंभ करण्यात आला.

मुरुगेंद्रगौडा पाटील यांनी या सर्व श्रमिकांचे पुष्पहार घालून आणि शाल जोडी देऊन यथोचित सत्कार केला. “समाजाच्या दळणवळणात अहोरात्र कष्ट करणाऱ्या या बांधवांना मान मिळणे गरजेचे आहे,” असे मत त्यांनी यावेळी व्यक्त केले. या सन्मानाने भारावून गेलेल्या रिक्षाचालकांनी भावूक होत सांगितले की, “आजवर आम्हाला केवळ प्रवासी म्हणून पाहिले गेले, पण पहिल्यांदाच एका मोठ्या व्यासपीठावर मुख्य अतिथी म्हणून मान मिळाला, हा आमच्यासाठी सर्वोच्च क्षण आहे.” अशी प्रतिक्रिया यावेळी रिक्षाचालकांनी व्यक्त केली.