बागलकोट जिल्ह्यातील इळकल शहरात मध्यरात्री भीषण आगीची घटना घडली असून दुचाकींच्या गॅरेजला आग लागल्याने लाखो रुपयांचे नुकसान झाले आहे. एका चित्रपटगृहाजवळ असलेल्या या गॅरेजमधील आठहून अधिक दुचाकी आगीच्या भक्ष्यस्थानी पडल्या आहेत.

बागलकोट जिल्ह्यातील इळकल शहरातील श्रीनिवास चित्रपटगृहाजवळ असलेल्या दुचाकी गॅरेजला मध्यरात्री अचानक आग लागली. कृष्ण वद्दी यांच्या मालकीच्या या गॅरेजला आग लागल्याचे समजताच परिसरातील नागरिकांमध्ये भीतीचे वातावरण पसरले होते. घटनेची माहिती मिळताच अग्निशमन दलाच्या जवानांनी घटनास्थळी धाव घेत आग विझवण्यात यश मिळवले. मात्र, तोपर्यंत गॅरेजमधील ग्राहकांच्या आठ दुचाकी पूर्णपणे जळून खाक झाल्या होत्या.

आगीचे नेमके कारण अद्याप स्पष्ट झालेले नाही. शॉर्ट सर्किटमुळे ही आग लागली असावी किंवा अन्य काही कारण आहे, याचा तपास पोलीस करत आहेत. इळकल शहर पोलिसांनी घटनास्थळी भेट देऊन पाहणी केली असून याप्रकरणी नोंद करण्यात आली आहे. लाखो रुपयांच्या दुचाकी जळाल्याने गॅरेज मालक कृष्ण वद्दी यांना मोठा धक्का बसला आहे.