बेळगाव ग्रामीण मतदारसंघातील दिव्यांगांच्या सक्षमीकरणासाठी आणि सरकारी योजनांचा लाभ त्यांच्या घरापर्यंत पोहोचवण्यासाठी सात ग्रामपंचायतींमध्ये ‘ग्रामीण पुनर्वसन कार्यकर्त्यांची’ नियुक्ती करण्यात आली आहे.

महिला व बालविकास मंत्री लक्ष्मी हेब्बाळकर यांच्या हस्ते आज या कार्यकर्त्यांना अधिकृत नियुक्ती पत्रांचे वाटप करण्यात आले. या निर्णयामुळे ग्रामीण भागातील दिव्यांग बांधवांच्या आयुष्यात नवी उमेद निर्माण झाली आहे.

बेळगाव ग्रामीण क्षेत्रातील दिव्यांगांच्या कल्याणासाठी राबवण्यात येणाऱ्या महत्त्वपूर्ण योजनेअंतर्गत एकूण ७ ग्रामपंचायतींसाठी ‘ग्रामीण पुनर्वसन कार्यकर्त्यांची’ निवड प्रक्रिया पूर्ण झाली आहे. हे कार्यकर्ते ग्रामीण भागात राहणाऱ्या दिव्यांगांच्या गरजा ओळखून त्यांना मिळणारे मानधन, आवश्यक उपकरणे आणि विविध शासकीय योजनांची वेळेत अंमलबजावणी करण्यासाठी काम करतील. या नियुक्तीमुळे दिव्यांगांना मिळणाऱ्या सोयी-सुविधांना आता अधिक गती मिळणार आहे.

आज आयोजित करण्यात आलेल्या विशेष कार्यक्रमात पात्र उमेदवारांना नियुक्ती पत्रांचे वितरण करण्यात आले. याप्रसंगी विधान परिषद सदस्य चन्नराज हट्टीहोळी यांच्यासह अनेक मान्यवर उपस्थित होते. “तुमची सेवा समाजातील शेवटच्या घटकापर्यंत पोहोचली पाहिजे,” अशा शब्दांत मान्यवरांनी नवनियुक्त कार्यकर्त्यांना शुभेच्छा दिल्या. यावेळी जिल्हा दिव्यांग कल्याण अधिकारी नामदेव बिलकर आणि शंकरगौडा पाटील उपस्थित होते. दिव्यांगांच्या सर्वांगीण विकासासाठी हे पाऊल अत्यंत महत्त्वाचे असल्याचे मत मान्यवरांनी व्यक्त केले.