काँग्रेस सरकारने हजार दिवस पूर्ण झाल्यानिमित्त हावेरी येथे आयोजित केलेले संमेलन म्हणजे निव्वळ खोटेपणाचा प्रकार आहे, अशी घणाघाती टीका भाजप ग्रामीण जिल्हाध्यक्ष सुभाष पाटील यांनी केली आहे. शनिवारी बेळगाव येथील शासकीय विश्रामगृहात आयोजित पत्रकार परिषदेत ते बोलत होते.

राज्यात काँग्रेस सरकार सत्तेवर आल्यापासून भ्रष्टाचाराने कळस गाठला आहे. गृहलक्ष्मी योजनेचे ५० हजार कोटी रुपये अद्याप लाभार्थ्यांना मिळालेले नाहीत. खुद्द मुख्यमंत्री सिद्धरामय्या हे मुडा घोटाळ्याच्या चौकशीला सामोरे जात आहेत, असे सुभाष पाटील यांनी यावेळी नमूद केले.

काँग्रेसच्या काळात भ्रष्टाचाराने मर्यादा ओलांडल्या असून वाल्मिकी महामंडळातील १८७ कोटी रुपयांची लूट आणि १५,५६८ कोटी रुपयांचा स्मार्ट मीटर घोटाळा ही या सरकारची ओळख बनली आहे. मुख्यमंत्र्यांवर भ्रष्टाचाराचे गंभीर आरोप असून हे सरकार आता भ्रष्टाचाराचा अड्डा बनले आहे, असा आरोप सुभाष पाटील यांनी केला.

राज्य उत्पादन शुल्क विभागातील एका ऑडिओ क्लिपमुळे मंत्र्यांना देण्यासाठी कोट्यवधी रुपयांची लाच मागितली जात असल्याचे उघड झाले आहे. यावरून काँग्रेस सरकारची वसुलीची टोळी कार्यरत असल्याचे स्पष्ट होते, असेही सुभाष पाटील यांनी स्पष्ट केले.

माजी मंत्री बी. नागेंद्र, आमदार सतीश सेल आणि वीरेंद्र पप्पी यांसारखे काँग्रेसचे बडे नेते भ्रष्टाचाराच्या आरोपाखाली तुरुंगात गेले आहेत. हे सरकार भ्रष्टाचाऱ्यांना पाठीशी घालणारे आहे, याचा हा जिवंत पुरावा असल्याची टीका सुभाष पाटील यांनी केली.

राज्यातील कंत्राटदार या प्रशासनाचा ‘६० टक्के कमिशन सरकार’ असा उल्लेख करत आहेत. प्रत्येक कामाचे बिल मंजूर करून घेण्यासाठी लाच देणे अनिवार्य झाले असून, या परिस्थितीमुळे सुभाष पाटील यांनी तीव्र नाराजी व्यक्त केली.

या पत्रकार परिषदेला रमेश देशपांडे यांच्यासह इतर पदाधिकारी उपस्थित होते.