​बागलकोट जिल्ह्यातील बदामी तालुक्यातील सागनूर गावात गुरुवारी मध्यरात्री एका काँग्रेस नेत्याची निर्घृण हत्या करण्यात आली आहे.

प्राथमिक माहितीनुसार, घराबाहेर पडलेल्या नेत्यावर दबा धरून बसलेल्या हल्लेखोरांनी दगडाने ठेचून त्यांचा खून केला आणि पुरावा नष्ट करण्यासाठी मृतदेह जवळच्या विहिरीत फेकून दिला. या घटनेमुळे परिसरात तणावाचे वातावरण निर्माण झाले असून पोलीस घटनास्थळी दाखल झाले आहेत.

​बागलकोट जिल्ह्यातील सागनूर येथील काँग्रेस नेते शिवप्पा मेटी (वय ४८) यांची अत्यंत क्रूरपणे हत्या करण्यात आली आहे. गुरुवारी रात्री शिवप्पा घराबाहेर पडले असता, अज्ञात हल्लेखोरांनी त्यांच्या डोक्यात दगड घालून त्यांचा जीव घेतला. हत्येनंतर आरोपींनी मृतदेह विहिरीत फेकून पळ काढला असून, आज सकाळी ही घटना उघडकीस आल्यानंतर ग्रामस्थांमध्ये भीतीचे वातावरण पसरले आहे.

​केरुर पोलीस ठाण्याच्या अधिकाऱ्यांनी घटनास्थळी भेट देऊन पंचनामा केला आहे. या हत्येमागे मालमत्तेचा वाद किंवा अनैतिक संबंधांचे कारण असावे, असा प्राथमिक संशय पोलिसांनी व्यक्त केला आहे. शिवप्पा मेटी यांच्या निधनाने त्यांच्या कुटुंबावर दुःखाचा डोंगर कोसळला असून, पोलिसांनी गुन्हा दाखल करून आरोपींच्या शोधासाठी पथके रवाना केली आहेत.