बाराव्या शतकात महात्मा बसवेश्वर आणि सर्व शरणांनी समाजातील जातिभेद नष्ट करण्याचा प्रयत्न केला. मानवी जात एकच असून सर्व माणसे समान आहेत, असा वैश्विक संदेश कायक शरणांनी दिला, असे मत अंजुमन पदवी महाविद्यालयाचे निवृत्त प्राचार्य डॉ. एच.आय. तिम्मापूर यांनी व्यक्त केले.

बेळगाव येथील कुमार गंधर्व कला मंदिरात जिल्हा प्रशासनाच्या वतीने आयोजित कायक शरण जयंती सोहळ्यात बोलताना डॉ. एच. आय. तिम्मापूर यांनी १२ व्या शतकातील शरणांच्या क्रांतीकारी विचारांचा आढावा घेतला. मादर चेन्नय्या, डोहर कक्कय्या, समगार हरळय्या आणि उरिलिंग पेद्दी यांसारख्या महापुरुषांनी ‘कायकवे कैलास’ हा मंत्र देत जातिभेद नष्ट करून मानव धर्म श्रेष्ठ असल्याचा संदेश दिला. शरणांची भक्ती ही केवळ सुखासाठी नसून ती सत्य आणि कष्टावर आधारित होती; ज्यामध्ये प्रत्यक्ष शिवानेही शरणांच्या भक्तीची ओढ मान्य केली होती. जन्माने नव्हे तर आचरणाने कूळ ठरते, असे प्रतिपादन करत डॉ. तिम्मापूर यांनी शरणांचे वचन साहित्य घराघरात पोहोचवून समतावादी समाज निर्माण करण्याचे आवाहन केले.

मानवता टिकवण्यासाठी शरणांच्या वचनांचे पालन करणे आणि समतावादी समाजाची निर्मिती करणे आवश्यक आहे, असे मत बसवराज रोट्टी यांनी व्यक्त केले.

या कार्यक्रमाला अपर जिल्हाधिकारी विजयकुमार होनकेरी, कन्नड आणि संस्कृती विभागाच्या उपसंचालिका विद्यावती भजंत्री, मल्लेश चौगुले, अनंतकुमार ब्याकुड, भीमराव पवार, विठ्ठल पोळ, करेप्पा गुडेन्नवर आणि इतर मान्यवर उपस्थित होते.