बेळगावमधील शिवबसवनगर येथील ‘द इन्स्टिट्यूट ऑफ इंजिनिअर्स (इंडिया)’ स्थानिक केंद्रात ६ आणि ७ फेब्रुवारी रोजी जलसंपत्ती प्रकल्प, त्यांचे व्यवस्थापन आणि शाश्वतता या विषयावर राष्ट्रीय कार्यशाळेचे आयोजन करण्यात आले आहे. या महत्त्वपूर्ण उपक्रमाची माहिती कार्यक्रम समितीचे अध्यक्ष सी. बी. हिरेमठ यांनी दिली.

बुधवारी बेळगाव येथे आयोजित पत्रकार परिषदेत बोलताना हिरेमठ यांनी सांगितले की, सिंचन विभाग आणि इन्स्टिट्यूट ऑफ इंजिनिअरिंग यांच्या संयुक्त विद्यमाने ही कार्यशाळा पार पडणार आहे. या कार्यक्रमाचे उद्घाटन आयझान हुसेन, जयप्रकाश, राजेश अम्मिनभावी आणि बी. के. कुलकर्णी यांच्या हस्ते होणार असून, जलसंपत्ती क्षेत्रातील ९ अनुभवी तज्ज्ञ विविध विषयांवर मार्गदर्शन करणार आहेत.

देशाला अन्नधान्याबाबत स्वावलंबी करण्यासाठी राज्यामध्ये अनेक जलसंपत्ती प्रकल्प राबविण्यात आले आहेत. हे सर्व प्रकल्प निश्चित पर्जन्यमानाचा आधार घेऊन आखण्यात आले होते. मात्र, अलीकडच्या काळात अनियंत्रित विकासामुळे हवामानात मोठे बदल होत असून, त्याचा परिणाम म्हणून पावसाच्या वेळापत्रकात आणि प्रमाणात तफावत जाणवत आहे, असे सी. बी. हिरेमठ म्हणाले.

हवामानातील बदलांमुळे पावसाची अनिश्चितता वाढली असून, याचा थेट परिणाम जलसंपत्ती प्रकल्पांच्या व्यवस्थापनावर होत आहे. या पार्श्वभूमीवर, प्रतिकूल हवामानात या प्रकल्पांची कार्यक्षमता आणि शाश्वतता कशी टिकवून ठेवता येईल, याचा अभ्यास करणे गरजेचे आहे. बदललेल्या परिस्थितीत या योजना कशा प्रकारे सुसंगत करता येतील, यावर सविस्तर चर्चा आणि सल्लामसलत होणे आवश्यक असल्याचे सी. बी. हिरेमठ यांनी नमूद केले.

या पत्रकार परिषदेला डॉ. व्यंकटेश, विलास बदामी, एस. एम. मेटी, एस. वाय. कुंदरगी यांच्यासह इतर मान्यवर उपस्थित होते.