निरोगी आरोग्यासाठी स्वच्छतेची सवय अंगी बाणवणे काळाची गरज असून, आपल्या परिसरासोबतच मनही स्वच्छ ठेवल्यास उत्तम आरोग्य लाभते, असे प्रतिपादन वरिष्ठ दिवाणी न्यायाधीश राजण्णा संकण्णवर यांनी केले.

राष्ट्रीय स्वच्छता दिनानिमित्त हुक्केरी येथील न्यायालय परिसरात स्वच्छता मोहिमेचे आयोजन करण्यात आले होते. हुक्केरी नगरपालिका, वकील संघटना, विधी सेवा समिती आणि विविध विभागांच्या संयुक्त विद्यमाने हा उपक्रम राबवण्यात आला. वरिष्ठ न्यायाधीश राजण्णा संकण्णवर आणि आदित्य कलाल यांच्या हस्ते या मोहिमेचा प्रारंभ झाला. यावेळी प्रसारमाध्यमांशी बोलताना न्यायाधीश राजण्णा संकण्णवर म्हणाले की, आपल्या सभोवतालचा परिसर स्वच्छ राखणे ही प्रत्येकाची जबाबदारी आहे. नगरपालिकेच्या नियमानुसार ओला आणि सुका कचरा वेगळा करून तो कचरा संकलन करणाऱ्या वाहनांकडे द्यावा, ज्यामुळे पर्यावरणाचे रक्षण होऊन शहर कचरामुक्त होण्यास मदत होईल.

या कार्यक्रमाला नगरपालिकेचे मुख्य कार्यकारी अधिकारी ईश्वर सिद्नाळ, आरोग्य अधिकारी संतोष होळेन्नवर, पर्यावरण अभियंता रेवती आर., दफेदार ए. जे. मोकाशी आणि वकील संघटनेचे अध्यक्ष काडप्पा कुरबेट प्रामुख्याने उपस्थित होते. तसेच एस. जे. नदाफ, बसवराज हुंडेकर, उमेश पाटील, प्रकाश पाटील, विठ्ठल गस्ती, आशा सिंगाडे, अनिता कुलकर्णी, बी. बी. बागी, ए. सी. करोशी, सी. एम. समसुद्दी यांसह विविध विभागांचे अधिकारी व कर्मचारी उपस्थित होते.

न्यायालय परिसराच्या स्वच्छतेपासून सुरू झालेली ही मोहीम घर आणि मनाच्या स्वच्छतेपर्यंत पोहोचली पाहिजे, असा संदेश यावेळी देण्यात आला.