विजापूर येथील शिवगिरीतील ८५ फूट उंच शिवमूर्तीच्या स्थापनेला यंदा २० वर्षे पूर्ण होत असल्याच्या निमित्ताने महाशिवरात्रीचा उत्सव विशेष धार्मिक आणि सामाजिक उपक्रमांनी साजरा केला जाणार आहे.

विजापूर शहराचे भूषण असलेल्या शिवगिरीतील ८५ फूट उंच शिवमूर्ती दरवर्षी भाविकांचे श्रद्धास्थान असते. यंदा या मूर्तीची स्थापना होऊन २० वर्षे पूर्ण होत असल्याने टी. के. पाटील चॅरिटेबल ट्रस्टने विशेष सोहळ्याचे आयोजन केले आहे. चित्रपट निर्माते आणि उद्योजक बसंतकुमार पाटील यांच्या मार्गदर्शनाखाली ट्रस्टने पर्यावरण रक्षणासाठी १० हजार वृक्षांची लागवड केली असून, सामूहिक विवाह आणि अन्नदानाचे कार्यही अविरत सुरू आहे. या २० वर्षांच्या वाटचालीनिमित्त यंदा भाविकांसाठी विशेष होम-हवन आयोजित करण्यात आले असून यात भाविकांना प्रत्यक्ष सहभागी होता येईल, अशी माहिती ट्रस्टचे सदस्य श्रीनिवास कुलकर्णी यांनी दिली.

१४ फेब्रुवारीपासून शिवगिरीमध्ये विविध धार्मिक आणि सांस्कृतिक कार्यक्रमांना प्रारंभ होणार आहे. १५ फेब्रुवारी रोजी महाशिवरात्रीनिमित्त पहाटे ४:३० वाजता होम-हवन, रुद्राभिषेक, भस्मार्चना आणि पंचाक्षरी पूजा पार पडेल. दिवसभर दर तासाला विविध विधींचे नियोजन करण्यात आले असून पहाटे शहनाई वादनाने कार्यक्रमाची सांगता होईल. सकाळी ८:३० वाजता जत्रोत्सवाचे ध्वजारोहण आणि दुपारी ३:३० वाजता महिलांचा ओटी भरण्याचा कार्यक्रम होईल. सायंकाळी ४:३० वाजता २३ फूट उंच सुवर्णलेपित रथातून शिवाची चांदीची पालखी निघणार आहे. विजापूरमधील सुवासिनी आणि सुना या रथाचा दोर ओढणार असून, हे या उत्सवाचे मुख्य आकर्षण असेल. भक्तांना भक्तीरसात न्हाऊ घालण्यासाठी सांस्कृतिक कार्यक्रमांचीही जय्यत तयारी करण्यात आल्याचे आरती पाटील यांनी सांगितले.

महाशिवरात्रीच्या निमित्ताने संपूर्ण मंदिर परिसराची सजावट करण्यात आली असून विविध धार्मिक विधींची आखणी पूर्ण झाली आहे. भाविकांना दर्शन आणि पूजेसाठी सर्व सोयी-सुविधा उपलब्ध करून देण्यात आल्या असून भजनी मंडळांच्या कार्यक्रमांचेही आयोजन या उत्सवात करण्यात आले आहे.