हुक्केरी येथील टीपू सुलतान संयुक्त पदवीपूर्व महाविद्यालयात विद्यार्थ्यांच्या मनातील परीक्षेची भीती दूर करण्यासाठी विशेष मार्गदर्शन कार्यक्रमाचे आयोजन करण्यात आले होते. यमकनमर्डीचे पोलीस निरीक्षक जावेद मुशापुरे यांनी यावेळी विद्यार्थ्यांना यशाचा मार्ग दाखवला.

विद्यार्थ्यांनी मोबाईल आणि चैनीच्या गोष्टींच्या आहारी न जाता केवळ आपल्या ध्येयावर लक्ष केंद्रित करावे. कठोर परिश्रम आणि सततचा सराव हीच यशाची गुरुकिल्ली आहे. आपला वेळ वाया न घालवता विद्यार्थ्यांनी अभ्यासात सातत्य ठेवावे, जेणेकरून आपल्या पालकांचा आणि शाळेचा नावलौकिक वाढेल असे जावेद मुशापुरे यांनी म्हटले.

यावेळी व्यासपीठावर संस्थेचे सरचिटणीस शाहीदरजा पीरजादे आणि प्राचार्य राजू इंगोली उपस्थित होते. कार्यक्रमात बेळगाव जिल्हा मुस्लिम कल्याण आणि शिक्षण संस्थेचे अध्यक्ष इक्बाल अहमद पीरजादे यांचा विशेष सत्कार करण्यात आला.

विद्यार्थी जीवनात मेहनतीला पर्याय नाही. प्रयत्नांची पराकाष्ठा करून उच्च शिक्षण घ्यावे आणि समाजासमोर एक उत्तम आदर्श निर्माण करावा अशी प्रतिक्रिया इक्बाल अहमद पीरजादे यांनी दिली.

या प्रसंगी व्यवस्थापन समितीचे सदस्य हसनसाब मुजावर, कलंदर मोकाशी, मामू मोकाशी, हजरत पीरजादे, अस्लम शेखबडे, जहांगीर इनामदार यांच्यासह महाविद्यालयाचे प्राध्यापक, कर्मचारी आणि विद्यार्थी मोठ्या संख्येने उपस्थित होते.