येत्या ४ फेब्रुवारी रोजी धारवाडमधील गरग येथे श्री मडीवाळेश्वर रथोत्सव सोहळा मोठ्या उत्साहात साजरा होणार आहे. या निमित्ताने विविध धार्मिक आणि सामाजिक कार्यक्रमांचे आयोजन करण्यात आले असल्याची माहिती जगद्गुरू मडीवाळेश्वर कल्मठाचे चन्नबसव महास्वामीजी यांनी दिली आहे.

या सोहळ्याविषयी माध्यमांशी बोलताना महास्वामीजींनी सांगितले की, चमत्कारिक महापुरुष आणि महाशिवयोगी मडीवाळेश्वर यांचा रथोत्सव ४ फेब्रुवारी रोजी पार पडणार आहे. या महोत्सवाचे औचित्य साधून ३१ जानेवारी रोजी गोवंश संरक्षण आणि शेती विषयावर विशेष सभा आयोजित करण्यात आली आहे. तर १ फेब्रुवारी रोजी ग्रामीण साहित्य, डक्का साहित्य संमेलन आणि शिवदीक्षा विधी पार पडतील.

या महोत्सवाचे खास आकर्षण म्हणजे यादरम्यान सामूहिक विवाह सोहळ्यांचेही आयोजन करण्यात आले आहे. भाविकांनी या सर्व कार्यक्रमांचा लाभ घ्यावा, असे आवाहन चन्नबसव महास्वामीजी यांनी केले आहे.