विजापूर मधील बेरोजगार तरुणांना रोजगाराच्या संधी उपलब्ध करून देण्यासाठी २ फेब्रुवारी रोजी सकाळी ९ ते सायंकाळी ५ या वेळेत शहराच्या दर्बार हायस्कूल मैदानावर भव्य रोजगार मेळावा आयोजित करण्यात आला आहे.

या मेळाव्यामध्ये बेंगळुरू, बेळगाव, कलबुर्गी, म्हैसूर यांसह कर्नाटकातील विविध शहरांतील आणि इतर राज्यांमधील सुमारे १४० हून अधिक कंपन्या सहभागी होणार आहेत. एकूण १५० पेक्षा जास्त नामांकित कंपन्या उमेदवारांची निवड करण्यासाठी येणार असून बेरोजगार तरुणांसाठी ही एक उत्तम संधी आहे. विजापूर जिल्ह्याचे पालकमंत्री एम. बी. पाटील यांनी जिल्ह्यातील तरुणांना या संधीचा लाभ घेण्याचे आवाहन केले आहे.

इच्छुक उमेदवारांनी http://udyogamela.ksdckarnataka.com या संकेतस्थळावर जाऊन आपली नोंदणी करावी असे आवाहन एम. बी. पाटील यांनी केले आहे. जिल्ह्याच्या सर्वांगीण विकासासाठी आणि तरुणांच्या हाताला काम देण्यासाठी या मेळाव्याचे आयोजन करण्यात आले असल्याचे त्यांनी नमूद केले.