बागलकोट जिल्ह्यातील मुधोळ तालुक्यातील शेतकरी आणि प्रभुलिंगेश्वर साखर कारखाना यांच्यातील संघर्ष आता टोकाला पोहोचला असून, उद्या २३ जानेवारी रोजी शेतकऱ्यांनी ‘शिरोळ चलो’ची हाक दिली आहे.

प्रभुलिंगेश्वर साखर कारखान्याने १७ शेतकरी नेत्यांना नोटिसा बजावून कारखाना परिसराच्या ५०० मीटर व्याप्तीमध्ये आंदोलन करण्यास मनाई केली आहे. कारखान्याच्या या भूमिकेमुळे शेतकरी संतप्त झाले असून, शेतकऱ्यांचा अपमान केल्याचा आरोप आंदोलकांनी केला आहे. या दडपशाहीचा निषेध करण्यासाठी उद्या शिरोळ गावाजवळील राज्य महामार्गावर रस्ता रोको आंदोलन करण्यात येणार आहे.

शेतकरी नेते बसवंतप्पा कांबळे यांनी आजपासूनच कारखान्याला ऊस पुरवठा थांबवण्याचे आवाहन सर्व शेतकऱ्यांना केले आहे. “कारखाना मालकांच्या मनमानीला धडा शिकवण्यासाठी मोठ्या संख्येने एकत्र यावे,” असे आवाहन त्यांनी केले आहे. उद्याच्या या आंदोलनामुळे मुधोळ परिसरात तणावाचे वातावरण असून प्रशासनासमोर सुरक्षेचे मोठे आव्हान उभे राहिले आहे.