रायबाग तालुक्यातील बावनसौंदत्ती येथील ओंकार आश्रम मठाचे श्री शिवशंकर महास्वामीजी (वय ६३) यांचे आज निधन झाले. त्यांच्या निधनामुळे संपूर्ण परिसरात शोककळा पसरली असून, उद्या सकाळी धार्मिक विधींनुसार त्यांच्यावर अंत्यसंस्कार करण्यात येणार आहेत.

बुधवारी सायंकाळी ६ वाजेपासून गुरुवार सकाळी ८ वाजेपर्यंत भाविकांना पूज्य स्वामीजींचे अंतिम दर्शन घेता यावे, यासाठी महादेव आवार परिसरात त्यांचे पार्थिव ठेवण्यात येणार आहे. त्यानंतर सकाळी ८:३० वाजता गावातील प्रमुख मार्गावरून स्वामीजींची अंत्ययात्रा काढण्यात येईल. सकाळी १०:३० च्या सुमारास वीरशैव लिंगायत परंपरेनुसार ओंकार आश्रम मठाच्या आवारातच त्यांच्यावर अंत्यसंस्कार केले जातील, अशी माहिती ग्रामपंचायत सदस्य धूळगौडा पाटील यांनी दिली.

या अंत्यविधीच्या नियोजनासाठी नंदीकुराळी येथील पंचलिंगेश्वर वीरभद्रेश्वर स्वामीजींच्या नेतृत्वाखाली ग्रामस्थांची आणि समाजातील प्रमुखांची एक महत्त्वाची बैठक पार पडली. या बैठकीत अंत्यसंस्काराच्या सर्व विधींची रूपरेषा ठरवण्यात आली असल्याचे त्यांनी सांगितले.

यावेळी श्री शंकरानंद स्वामीजी, ग्रामपंचायत अध्यक्ष रामचंद्र काटे, सत्यप्पा भिष्ठे, तात्यासाहेब काटे, अनिल हंजे, चिदानंद मंगसुळे, प्रकाश भिष्ठे, काकासाहेब तडाके, मारुती चौगुले, जयकुमार खेमलापुरे, अजित गौराज, सतीश मंगसुळे, महालिंग शास्त्री, महादेव रेंदाळे यांच्यासह गावातील अनेक मान्यवर आणि भक्तगण मोठ्या संख्येने उपस्थित होते.