कर्नाटक राज्य माध्यमिक शाळा सहशिक्षक संघाच्या २०२५-२७ या वर्षाच्या कार्यकारिणीसाठी नामनिर्देशित सदस्य म्हणून अशोक अण्णिगेरी यांची नियुक्ती करण्यात आली असून, त्यांची राज्य उपाध्यक्षपदी निवड झाली आहे.

बेंगळुरू येथील राज्य सरकारी कर्मचारी संघाच्या सभागृहात आयोजित राज्य कार्यकारिणीच्या बैठकीत ही घोषणा करण्यात आली. या बैठकीत संघाचे प्रदेशाध्यक्ष बी. सिद्धबसप्पा आणि सरचिटणीस देवराजे गौडा यांनी बेळगाव जिल्ह्यातील खानापूर तालुक्यातील गोल्लाळी येथील मालतीबाई साळुंखे माध्यमिक विद्यालयातील ज्येष्ठ संघटक अशोक अण्णिगेरी यांना नियुक्तीचे प्रमाणपत्र देऊन गौरविले. या निवडीबद्दल त्यांचे सर्वत्र कौतुक होत आहे.

संघाची प्रगती आणि शिक्षकांच्या प्रलंबित समस्यांबाबत या सभेत सविस्तर चर्चा करण्यात आली. या बैठकीला राज्यातील ३२ जिल्ह्यांतील पदाधिकारी उपस्थित होते. राज्य उपाध्यक्षपदी निवड झाल्याबद्दल अशोक अण्णिगेरी यांचे संघाचे अध्यक्ष, पदाधिकारी आणि विविध शाळांतील शिक्षकांनी अभिनंदन केले असून, शैक्षणिक क्षेत्रात आनंद व्यक्त होत आहे, असे त्यांनी म्हटले.