सौंदत्ती यल्लम्मा देवीचे दर्शन घेऊन परतलेल्या भाविकांनी कणबर्गी येथील श्री रेणुकादेवी मंदिरात आयोजित भव्य जत्रेत मोठ्या उत्साहाने सहभाग घेतला. अत्यंत श्रद्धेने पार पडलेल्या या उत्सवात भाविकांनी देवीच्या जयघोषात सेवा अर्पण केली.

बेळगाव जिल्ह्यात अत्यंत वैशिष्ट्यपूर्ण म्हणून ओळखल्या जाणाऱ्या या यात्रेत यंदा भाविकांचा जनसागर लोटला होता. मंदिर समितीच्या वतीने आयोजित या सोहळ्यात सुमारे ६०० परड्या आणि ३५ रेणुकादेवीच्या जगांनी सहभाग नोंदवला. परडी भरण्याचा कार्यक्रम अत्यंत भक्तिभावाने पार पडला असून कणबर्गीची ही यात्रा आपल्या आगळ्यावेगळ्या परंपरा आणि भव्यतेमुळे प्रसिद्ध आहे.

मंदिर समितीचे अध्यक्ष नागेश गड्डे यांच्या नेतृत्वाखाली समितीच्या सर्व पदाधिकाऱ्यांनी शिस्तबद्ध नियोजन करून ही यात्रा यशस्वी करण्यासाठी परिश्रम घेतले. यावेळी परिसरातील ज्येष्ठ नागरिक, स्थानिक नेते आणि हजारो भाविकांनी उपस्थित राहून देवीचे दर्शन घेतले आणि आशीर्वाद प्राप्त केला.