विजापूर जिल्ह्यातील सिंदगी तालुक्यातील बनहट्टी पीए गावात ऊसाच्या फडाला लागलेली आग विझवताना एका शेतकऱ्याचा मृत्यू झाला. आपल्या कष्टाचे पीक वाचवण्याच्या प्रयत्नात हा शेतकरी आगीच्या भक्ष्यस्थानी पडला. या हृदयद्रावक घटनेमुळे गावात शोककळा पसरली आहे.

मल्लनगौडा बिरादार उर्फ मेलिनमणी असे मृत शेतकऱ्याचे नाव आहे. त्यांच्या स्वतःच्या मालकीच्या शेतात ही आग लागली होती. शेतकरी मल्लनगौडा यांनी आगीवर नियंत्रण मिळवण्यासाठी शर्थीचे प्रयत्न केले. मात्र, आगीची धग प्रचंड असल्याने त्यांचा जागीच होरपळून मृत्यू झाला.

या भीषण आगीत मल्लनगौडा यांच्यासह ऊसाचे पीकही पूर्णपणे जळून खाक झाले आहे. आगीने रौद्ररूप धारण केल्याने मोठ्या प्रमाणात नुकसान झाले.

घटनेची माहिती मिळताच पोलिसांनी तातडीने घटनास्थळी धाव घेऊन पाहणी केली. ही घटना देवरहिप्परगी पोलीस ठाण्याच्या हद्दीत घडली असून पोलीस या प्रकरणाचा तपास करत आहेत.