बागलकोट जिल्ह्यातील हुनगुंद तालुक्यातील कमतगी शहराजवळ १० जानेवारी रोजी झालेल्या भीषण ट्रॅक्टर अपघातातील मृतांची संख्या आता पाच झाली आहे. या अपघाताने संपूर्ण परिसरात हळहळ व्यक्त होत आहे.

या अपघातात गंभीर जखमी झालेल्या पार्वतीबाई (वय ३०) आणि तिचा भाऊ पांडू नायक (वय २६) या दोघांचा आज बागलकोटमधील खासगी रुग्णालयात उपचारादरम्यान मृत्यू झाला. गेल्या शनिवारी ट्रॅक्टरच्या इंजिनचा बंपर तुटल्याने ट्रॅक्टर उलटला होता आणि त्याखाली चिरडून हा भीषण अपघात झाला होता. एकाच कुटुंबातील दोन सदस्यांचा आज मृत्यू झाल्याने नातेवाईकांनी केलेला आक्रोश हृदयद्रावक होता असे त्यांनी म्हटले.

अपघाताच्या दिवशीच रुक्मिणीबाई (वय ३२), तिची मुलगी शिवानी (वय ६) आणि पार्वतीबाई यांचा मुलगा रोशन (वय ५) यांचा जागीच मृत्यू झाला होता. मृत नागरिक विजयनगर जिल्ह्यातील अनेकल तांडा आणि ताळेबसापूर तांडा येथील रहिवासी असून ऊसतोडीचे काम संपवून आपल्या ट्रॅक्टरने गावी परतत असताना हा भीषण अपघात घडला. दोन कुटुंबातील पाच सदस्यांचा बळी गेल्याने संपूर्ण तांड्यावर शोककळा पसरली असल्याची भावना ग्रामस्थांनी व्यक्त केली.