बेळगाव तालुक्यातील कणबर्गी येथील सरकारी वरिष्ठ प्राथमिक शाळेत १९९६ च्या पहिल्या इयत्तेतील माजी विद्यार्थ्यांनी ११ जानेवारी २०२६ रोजी ‘गुरुवंदना’ आणि ‘स्नेहसंमेलन’ कार्यक्रमाचे आयोजन केले होते. सुमारे ३० वर्षांपूर्वी आपल्याला अक्षर ओळख करून देणाऱ्या शिक्षकांप्रति कृतज्ञता व्यक्त करण्यासाठी या विद्यार्थ्यांनी हा सोहळा घडवून आणला.

यावेळी विद्यार्थ्यांनी आपल्या गुरुजनांचा शाल आणि स्मृतीचिन्ह देऊन भावपूर्ण सत्कार केला. बालपणीच्या आठवणींना उजाळा देत आपल्या आयुष्याला आकार देणाऱ्या शिक्षकांचे आशीर्वाद घेताना सर्व विद्यार्थी भावूक झाले होते. अनेक वर्षांनंतर जुने मित्र एकत्र आल्याने शाळेचा परिसर आनंदाने न्हाऊन निघाला होता.

या स्नेहमेळाव्यात बाबूगौडा पाटील, विजय ट्यानगी, प्रफुल्ल चिकमठ, श्रीदेवी अष्टगी, रेखा पाटील यांच्यासह ७० हून अधिक माजी विद्यार्थी सहभागी झाले होते. शिक्षण संपल्यानंतर विविध क्षेत्रात स्थिरावलेले हे मित्र प्रदीर्घ काळानंतर एकत्र आले होते. यावेळी त्यांनी एकमेकांच्या खुशालीची विचारपूस केली आणि शाळेच्या विकासासाठी सहकार्य करण्याचा संकल्प सोडला. गुरु-शिष्यांच्या या अपूर्व भेटीचा कणबर्गी ग्रामस्थ साक्षीदार बनले.