बेळगाव जिल्ह्यातील बैलहोंगल तालुक्यातील संगोळी गावात क्रांतीवीर संगोळी रायण्णा यांच्या स्मृतीप्रत्यर्थ आयोजित करण्यात येणाऱ्या ‘संगोळी उत्सवा’चा आज भव्य शुभारंभ झाला. या सोहळ्यामुळे संपूर्ण परिसरात आनंदाचे आणि उत्साहाचे वातावरण पाहायला मिळत आहे.

या उत्सवाचे उद्घाटन बैलहोंगलचे आमदार महांतेश कौजलगी आणि कित्तूरचे आमदार बाबासाहेब पाटील यांच्या हस्ते करण्यात आले. यावेळी बैलहोंगल आणि कित्तूर तालुक्यातील विविध विभागांचे वरिष्ठ शासकीय अधिकारी आणि मान्यवर मोठ्या संख्येने उपस्थित होते.

दरवर्षीप्रमाणे यंदाही संगोळी उत्सव अतिशय थाटामाटात सुरू करण्यात आला असून, या उत्सवाच्या यशस्वीतेसाठी सर्व विभागांचे अधिकारी आपली जबाबदारी चोखपणे पार पाडत आहेत, असे आमदार महांतेश कौजलगी यांनी म्हटले.

आमदारांनी आपल्या भाषणात संगोळी रायण्णा यांच्या बलिदानाचा वारसा पुढच्या पिढीपर्यंत पोहोचवण्यासाठी हा उत्सव महत्त्वाचा असल्याचे नमूद केले. उत्सवाच्या निमित्ताने आयोजित विविध सांस्कृतिक आणि ऐतिहासिक कार्यक्रमांचा लाभ घेण्यासाठी नागरिकांनी मोठ्या संख्येने उपस्थित राहावे, असे आवाहन त्यांनी केले.