बागलकोट जिल्ह्यातील मदभावी गावात निवासी भागात बार सुरू करण्याच्या निर्णयावरून महिलांनी आक्रमक पवित्रा घेतला आहे. शेकडो महिलांनी एकत्र येत रस्त्यावर दारूच्या बाटल्या पेटवून आपला संताप व्यक्त केला.

बारमुळे मद्यपींचा वावर वाढेल आणि महिला तसेच शाळकरी मुलांना येण्या-जाण्यास त्रास होईल, असे महिलांचे म्हणणे आहे. या संदर्भात महिलांनी ग्रामपंचायत कार्यालय आणि महालिंगपूर पोलीस ठाण्यात जाऊन बार स्थलांतरित करण्याच्या मागणीचे निवेदन दिले. लोकवस्तीपासून बार दूर नेला नाही तर तीव्र आंदोलन छेडण्याचा इशारा यावेळी देण्यात आला.

जनहिताचा विचार करून जिल्हा प्रशासन आणि उत्पादन शुल्क विभागाने तातडीने यावर कारवाई करावी, अशी मागणी ग्रामस्थांनी केली आहे. आता प्रशासनाच्या भूमिकेकडे संपूर्ण तालुक्याचे लक्ष लागले आहे.