बेळगाव महानगरपालिकेत राष्ट्रकवी कुवेम्पू यांच्या जयंतीनिमित्त ‘विश्वमानव दिन’ मोठ्या उत्साहात साजरा करण्यात आला. कुवेम्पू यांचे साहित्य आणि विचारसरणी आजच्या समाजासाठी दीपस्तंभ असून, त्यांच्या विश्वमानव तत्त्वाचा अंगीकार करणे काळाची गरज असल्याचे प्रतिपादन मान्यवरांनी यावेळी केले.

जिल्हा प्रशासन, जिल्हा पंचायत, कन्नड व संस्कृती विभाग आणि बेळगाव महानगरपालिका यांच्या संयुक्त विद्यमाने येथील कुमार गंधर्व कला मंदिरात हा सोहळा पार पडला. महापौर मंगेश पवार, उपमहापौर वाणी जोशी, सभागृह नेते हनुमंत कोंगाली, मनपा उपायुक्त उदयकुमार तळवार आणि कन्नड व संस्कृती विभागाच्या उपसंचालिका विद्यावती भजंत्री यांच्या उपस्थितीत राष्ट्रकवी कुवेम्पू यांच्या प्रतिमेचे पूजन करून कार्यक्रमाचे उद्घाटन करण्यात आले.

यावेळी व्याख्याते प्राध्यापक काद्रोळ्ळी यांनी कुवेम्पू यांच्या विचारांवर प्रकाश टाकला. देशाच्या सीमा न ओलांडताही जागतिक स्तरावर ‘विश्वमानव’ म्हणून ओळखले जाणारे कुवेम्पू हे एकमेव व्यक्तिमत्व असल्याचे त्यांनी नमूद केले. या पृथ्वीतलावर मानवाप्रमाणेच इतर सर्व सजीवांना जगण्याचा अधिकार आहे, हीच विश्वमानवतेची खरी ओळख त्यांनी आपल्या साहित्यातून दिल्याचे प्रा. काद्रोळ्ळी यांनी सांगितले.

मनपा उपायुक्त उदयकुमार तळवार यांनी कुवेम्पू यांचा उल्लेख समाजाचे थोर मार्गदर्शक म्हणून केला. त्यांच्या कविता आणि साहित्य समाजासाठी मोलाची देणगी असून, अशा थोर महापुरुषाचे स्मरण करणे हे आपले भाग्य असल्याचे त्यांनी स्पष्ट केले. या कार्यक्रमाला महानगरपालिका आणि कन्नड व संस्कृती विभागाचे अधिकारी, कर्मचारी तसेच विविध शाळा-महाविद्यालयांतील विद्यार्थी मोठ्या संख्येने उपस्थित होते.

कुवेम्पू यांनी आपल्या साहित्यातून मानवतेचा वैश्विक संदेश दिला असून तो सर्वांनी आचरणात आणणे आवश्यक असल्याची प्रतिक्रिया मान्यवरांनी व्यक्त केली.