धारवाडच्या गामनगट्टी-तारीहाळ रस्त्यावर लॉरी चालकाच्या निष्काळजीपणामुळे भीषण अपघात झाला. भरधाव लॉरीने अचानक ब्रेक लावल्याने मागून येणारी दुचाकी धडकून तरुणाचा मृत्यू झाला.

धारवाड जवळील गामनगट्टी बाह्यवळण रस्त्यावर भरधाव वेगाने जाणाऱ्या लॉरी चालकाने अचानक ब्रेक लावल्याने पाठीमागून येणारा दुचाकीस्वार गंभीर जखमी झाला आणि त्यानंतर त्याचा मृत्यू झाला. ही घटना दुपारी दोनच्या सुमारास गामनगट्टी -तारीहाळ मार्गावर घडली आहे.

हुबळी येथील उणकल भागातील रहिवासी परशुराम राजपूत असे मृत दुचाकीस्वाराचे नाव आहे. एक लॉरी पुढे जात असताना दुसऱ्या लॉरीला ओव्हरटेक करण्याच्या प्रयत्नात चालकाने अचानक ब्रेक लावला. यामुळे मागून येणाऱ्या दुचाकीचा ताबा सुटला आणि ती लॉरीवर जोरात आदळली. या भीषण धडकेत दुचाकीस्वाराच्या डोक्याला गंभीर दुखापत झाली आणि तो जागीच रक्ताच्या थारोळ्यात पडला होता.

अपघाताचे दृश्य पाहून स्थानिक नागरिकांनी तातडीने मदतीसाठी धाव घेतली. हायवे पेट्रोलिंग आणि नव नगर एपीएमसी पोलीस ठाण्याला या घटनेची माहिती देण्यात आली. जखमी तरुणाला तातडीने खासगी वाहनातून हुबळीच्या किम्स रुग्णालयात दाखल करण्यात आले, मात्र वाटेतच त्याची प्राणज्योत मालवली. स्थानिक नागरिकांनी दिलेल्या माहितीनुसार, नव नगर एपीएमसी पोलीस ठाण्याच्या कर्मचाऱ्यांनी घटनास्थळी भेट देऊन पाहणी केली असून याप्रकरणी गुन्हा दाखल करण्यात आला आहे.