भरधाव वेगाने जाणारी दुचाकी अचानक घसरून पडल्याने चालकाच्या डोक्याला गंभीर दुखापत झाल्याची घटना मध्यरात्री धारवाडच्या तेजस्वी नगर रेल्वे पुलावर घडली आहे.

याबाबत मिळालेल्या अधिक माहितीनुसार, दुचाकीस्वार धारवाड-कलघटगी रस्त्यावरील तेजस्वी नगर मार्गाने जात असताना पुलावर चालकाचे नियंत्रण सुटले आणि हा अपघात झाला. ही घटना मध्यरात्री घडल्याने रस्त्यावरून जाणाऱ्या इतर वाहनचालकांनी तातडीने मदतीसाठी धाव घेतली आणि रुग्णवाहिका तसेच पोलिसांना याची माहिती दिली.

घटनेची माहिती मिळताच विद्यागिरी पोलीस ठाण्याचे कर्मचारी घटनास्थळी दाखल झाले. त्यांनी जखमी चालकाला तत्काळ उपचारासाठी जिल्हा रुग्णालयात हलवले. जखमी तरुण तेजस्वी नगर परिसरातील रहिवासी असल्याचे समजते, मात्र त्याची अधिक सविस्तर माहिती अद्याप उपलब्ध झालेली नाही. या अपघातात तरुणाच्या डोक्याला गंभीर दुखापत झाली असून, या प्रकरणाची नोंद विद्यागिरी पोलीस ठाण्यात करण्यात आली आहे.