बेळगाव जिल्ह्यातील रायबाग तालुक्यातील हारूगेरी शहराच्या उपनगरात वाळलेला चारा वाहून नेणाऱ्या एका ट्रकला विद्युत तारेचा स्पर्श झाल्याने भीषण आग लागल्याची घटना घडली आहे.

हारूगेरी शहराला तालुका केंद्राचा दर्जा मिळावा या मागणीसाठी पुकारलेल्या बंदमुळे ट्रक चालकाने रायबागकडे जाण्यासाठी पर्यायी मार्गाचा अवलंब केला होता. या प्रवासादरम्यान रस्त्यावरून गेलेल्या विद्युत तारेचा ट्रकला स्पर्श झाला आणि त्यातील वाळलेल्या चाऱ्याने त्वरित पेट घेतला. आग लागल्याचे लक्षात न आल्याने चालकाने काही अंतरापर्यंत ट्रक तसाच पुढे नेला, ज्यामुळे पेटलेला चारा संपूर्ण रस्त्यावर विखुरला गेला.

रस्त्यावर पेटलेला चारा पडत असल्याचे पाहून स्थानिक नागरिकांनी तातडीने धाव घेत पाणी टाकून आग विझवण्याचा प्रयत्न केला. त्यांच्या या सतर्कतेमुळे एक मोठा अनर्थ टळला. घटनेची माहिती मिळताच अग्निशमन दलाचे जवान घटनास्थळी दाखल झाले आणि त्यांनी आगीवर पूर्णपणे नियंत्रण मिळवले.

या अपघातात सुदैवाने कोणतीही जीवितहानी झाली नसून केवळ मालाचे नुकसान झाले आहे. या घटनेबाबत हारूगेरी पोलीस ठाण्यात नोंद करण्यात आली असून पोलीस अधिक तपास करत आहेत.