आपण मुख्यमंत्री म्हणून कायम राहणार की नाही, याबाबत काँग्रेस पक्षाचे ‘हायकमांड’ जो निर्णय घेईल, तोच अंतिम असेल, असे स्पष्ट मत मुख्यमंत्री सिद्धरामय्या यांनी व्यक्त केले. माजी मुख्यमंत्री एस. निजलिंगप्पा यांच्या जयंती कार्यक्रमात भाग घेतल्यानंतर ते माध्यमांशी बोलत होते.

आज माजी मुख्यमंत्री एस. निजलिंगप्पा यांच्या जयंती कार्यक्रमात भाग घेतल्यानंतर बोलताना मुख्यमंत्री सिद्धरामय्या म्हणाले, “माजी मुख्यमंत्री एस. निजलिंगप्पा यांच्या कार्याचे सरकार नेहमी स्मरण करेल. ते एक कार्यक्षम, प्रामाणिक व्यक्ती होते आणि ते अखिल भारतीय काँग्रेस समितीचे अध्यक्ष होते. एस. निजलिंगप्पा कर्नाटकने पाहिलेले एक अपवादात्मक राजकारणी होते. ते भ्रष्टाचारविरोधी राजकारणी होते आणि कर्नाटकच्या एकीकरणामध्येही त्यांचे मोठे योगदान आहे. त्यांचे तत्त्वज्ञान आणि आदर्श आम्हाला मार्गदर्शक आहेत,” असे त्यांनी नमूद केले.

सीएलपी बैठकीत आमदारांनी गॅरंटी योजनांमध्ये फेरबदल करण्याची विनंती केली आहे का, या प्रश्नावर त्यांनी उत्तर दिले. “बैठकीत गॅरंटी योजनांबद्दल कोणतीही चर्चा झाली नाही. सीएलपीमध्ये काय चर्चा झाली, हे मी येथे सांगू शकत नाही. मीच मुख्यमंत्री म्हणून पुढे कायम राहीन की नाही, हे ‘हायकमांड’ ठरवेल,” असे त्यांनी स्पष्ट केले.

धर्मस्थळ प्रकरणाशी संबंधित आरोपपत्रात षडयंत्राचा उल्लेख आहे का, असे विचारले असता, “मी आरोपपत्र पाहिले नाही,” असे ते म्हणाले. तुरीच्या पिकासंबंधी आपण पंतप्रधानांना पत्र लिहिले असल्याची माहितीही त्यांनी दिली.