विविध मागण्या पूर्ण करण्यासाठी कर्नाटक राज्य समगार हरळय्या संघाच्या नेतृत्वाखाली समगार समाजाच्या लोकांनी प्रथमच बेळगाव येथील सुवर्णसौधसमोरील सुवर्ण गार्डनमध्ये धरणे आंदोलन केले. समाजाच्या मागण्या सरकारने तातडीने पूर्ण कराव्यात, अशी जोरदार मागणी यावेळी करण्यात आली.

यावेळी समगार समाजाच्या नेत्यांनी सांगितले की, शिवशरण हरळय्या विकास महामंडळ स्थापन करून त्यासाठी स्वतंत्र निधीचे वाटप करण्यात यावे. तसेच, लिडकर महामंडळाच्या अध्यक्षपदी समगार समाजातील व्यक्तीचीच नियुक्ती करावी. बेंगळुरू येथे बीडीए मार्फत समाजाला दिलेल्या जागेवर शिवशरण हरळय्या भवन आणि कौशल्य विकास केंद्र बांधण्यासाठी तातडीने निधी मंजूर करावा आणि त्यासाठीची परवानगी द्यावी, अशी मागणीही यावेळी समाजबांधवांनी केली.

समगार समाजाच्या नेत्यांनी म्हटले की, कर्नाटक राज्यातील विविध जिल्ह्यांमध्ये असलेले समगार शिवशरण हरळय्या आणि कल्याणामा यांचे स्मारक विकसित करण्यासाठी सरकारने विशेष निधी देऊन त्यांचे जीर्णोद्धार करावे. समगार समाजातील कुटुंबांच्या आर्थिक आणि सामाजिक सुधारणांसाठी जागेसह अडकर शेड मंजूर करणे, जीवन विमा सुविधा देणे आणि हाऊसिंग योजनेद्वारे निवास सुविधा उपलब्ध करून देण्यासाठी सरकारने पाऊले उचलावीत, असे आवाहन त्यांनी केले.

या आंदोलनात कर्नाटक राज्य समगार हरळय्या संघाचे राज्याध्यक्ष जगदीश बेटगेरी, मानद अध्यक्ष यल्लाप्पा बेंडिगेरी, राज्य उपाध्यक्ष परशुराम अरकेरी यांच्यासह संघटनेचे पदाधिकारी महादेव कबाडी, पी. वासू, निरंजनबाबू तेलगांवी, कृष्णा बेटगेरी, विनायक कानडे, बेळगाव जिल्हाध्यक्ष गणेश काळे यांच्यासह समाजाचे हजारो नागरिक उपस्थित होते.