बेळगाव शहरात उद्या नोकरीच्या मागणीसाठी आंदोलन करण्याची तयारी करणाऱ्या ऑल कर्नाटक स्टेट स्टुडंट्स असोसिएशनला बेळगाव पोलीस विभागाने अनुमती नाकारली आहे.

शहरात विधानसभा अधिवेशन सुरू असल्यामुळे आणि कायदा व सुव्यवस्था राखण्याचे आव्हान समोर असल्याने पोलीस आयुक्तांनी हा निर्णय घेतला आहे. या निर्णयाकडे दुर्लक्ष करून आंदोलन करण्याचा प्रयत्न झाल्यास कठोर कायदेशीर कारवाई केली जाईल, अशी स्पष्ट चेतावणी पोलीस आयुक्त भूषण बोरसे यांनी दिली आहे.

अक्सा संघटनेने उद्या आंदोलन करण्यासाठी अर्ज दाखल केला होता. बेळगावात विधानसभा अधिवेशन सुरू असल्याने कोणत्याही परिस्थितीत कायदा व सुव्यवस्थेचा प्रश्न निर्माण होऊ नये, या कारणास्तव ही अनुमती नाकारण्यात आली आहे.

यापूर्वी धारवाड येथे अक्साच्या नेतृत्वाखाली झालेल्या आंदोलनामुळे सामान्य नागरिकांना त्रास झाला होता. ही पार्श्वभूमी विचारात घेण्यात आली आहे.

“गुप्तचर विभागाच्या अहवालानुसारही या आंदोलनाला अनुमती देण्यात आलेली नाही. सामान्य नागरिकांना कोणताही त्रास होऊ नये, यासाठी हे पाऊल उचलण्यात आले आहे.” असे त्यांनी म्हटले.

पोलीस विभागाचा नकार झुगारून कोणीही आंदोलन करण्याचा प्रयत्न केल्यास, त्यांच्यावर कायदेशीर कारवाई केली जाईल, असे आयुक्तांनी स्पष्ट केले आहे.