राज्य सरकारने गोवंश संरक्षण कायद्यात दुरुस्ती आणण्याचा प्रयत्न केल्याच्या विरोधात आज बागलकोटमध्ये हिंदुत्ववादी संघटनांनी मोठे आंदोलन केले.

विश्व हिंदू परिषद, बजरंग दल आणि श्रीराम सेनेचे शेकडो कार्यकर्ते जिल्हाधिकारी कार्यालयासमोर जमले आणि त्यांनी सरकारविरोधात जोरदार घोषणाबाजी केली. या कायद्यात दुरुस्ती करून सरकार गोतस्करांना अप्रत्यक्षपणे समर्थन देत आहे. हे पूर्णपणे हिंदूविरोधी धोरण आहे, अशी टीका या संघटनांच्या नेत्यांनी केली.

भाजप आणि जेडीएस युतीने सभागृहात या दुरुस्तीला जोरदार विरोध करावा. गोवंश संरक्षण विधेयक कोणत्याही बदलांशिवाय जैसे थे पुढे सुरू ठेवावे, अशी मागणी त्यांनी केली. याचवेळी त्यांनी केंद्र सरकारकडे गोवंशाला ‘राष्ट्रीय प्राणी’ म्हणून घोषित करण्याची मागणी केली.

आंदोलकांनी जिल्हाधिकाऱ्यांमार्फत राज्यपालांना निवेदन सादर केले. सरकारने त्वरित हा दुरुस्तीचा निर्णय मागे न घेतल्यास आंदोलन अधिक तीव्र करण्याचा इशारा त्यांनी दिला.