बेळगाव जिल्हा मध्यवर्ती सहकारी बँक सदस्यांच्या सलोख्याच्या बैठकीत सदस्यांच्या सूचना विचारात घेऊन, शेतकऱ्यांसाठी सर्व प्रकारच्या सुविधा उपलब्ध करून देण्याचे प्रयत्न बँक करणार असल्याचे संचालक तथा आरभावीचे आमदार भालचंद्र जारकीहोळी यांनी सांगितले.

आज बेळगाव येथील जिल्हा मध्यवर्ती सहकारी बँकेच्या सभागृहात सलोख्याची बैठक आयोजित करण्यात आली होती. व्यासपीठावर डीसीसी बँकेचे अध्यक्ष अण्णासाहेब जोल्ले, संचालक आमदार भालचंद्र जारकीहोळी, विधान परिषद सदस्य चन्नराज हट्टीहोळी, संचालक राहुल जारकीहोळी आणि प्रधान व्यवस्थापक कळवंत यांच्यासह अन्य मान्यवर उपस्थित होते. मान्यवरांच्या हस्ते कार्यक्रमाचे उद्घाटन झाले. त्यानंतर विविध पीकेपीएस सदस्यांकडून अध्यक्ष आणि संचालकांचा सत्कार करण्यात आला.

संचालक तथा आरभावीचे आमदार भालचंद्र जारकीहोळी यांनी सांगितले की, सदस्य आणि शेतकऱ्यांच्या सूचना ऐकून डीसीसी बँकेच्या प्रगतीसाठी प्रयत्न केले जात आहेत. बेळगाव तालुक्याचे तीन भाग असून, राहुल जारकीहोळी हे या भागाचे संचालक आहेत. ते सर्वांना विश्वासात घेऊन बँकेमार्फत प्रामाणिक सेवा देतील. शेतकऱ्यांसाठी सर्व सुविधा उपलब्ध करून, ही बँक उच्च स्तरावर पोहोचेल. अध्यक्ष आणि सर्व संचालकांचे मार्गदर्शन बँकेला लाभेल.

विधान परिषद सदस्य चन्नराज हट्टीहोळी म्हणाले, आगामी पाच वर्षांत डीसीसी बँकेला शिखरावर नेण्यासाठी प्रत्येक तालुका स्तरावर सविस्तर चर्चा आणि बैठका घेतल्या जात आहेत. राज्यभरात शून्य टक्के व्याजदराने सर्वाधिक पीक कर्ज देण्याचा मान बेळगाव डीसीसी बँकेने मिळवला आहे. शेतकरी हेच या बँकेचा कणा आहेत. कृषी आणि कृषीव्यतिरिक्त व्यवसायांसाठी कर्ज देऊन शेतकऱ्यांची सेवा करणे हेच आमच्या संचालक मंडळाचे ध्येय आहे. दहा गुंठे जमीन असलेल्या शेतकऱ्यालाही कर्ज देण्याचा ऐतिहासिक निर्णय बोर्डाच्या बैठकीत घेण्यात आला आहे. शेतकऱ्यांनी याचा लाभ घ्यावा. राष्ट्रीयीकृत बँकेपेक्षा डीसीसी बँकेसोबत शेतकऱ्यांनी अधिक व्यवहार वाढवावेत, असे आवाहन त्यांनी केले.

यानंतर विविध पीकेपीएस सदस्यांनी आपले मत आणि सूचना मांडल्या.