बेळगाव जिल्ह्यातील हुक्केरी तालुक्यामधील हत्तरगी टोल नाक्याजवळ झालेल्या दगडफेक प्रकरणात जखमी झालेल्या पोलीस कर्मचाऱ्यांची अतिरिक्त पोलीस महासंचालक हितेंद्र आर. यांनी शहरातील के.एल.ई. रुग्णालयात भेट घेऊन त्यांच्या प्रकृतीची चौकशी केली.

शेतकरी आंदोलनादरम्यान उद्भवलेल्या या हिंसाचारामुळे पोलीस दलाचे ११ कर्मचारी जखमी झाले असून, १० हून अधिक वाहनांचे मोठे नुकसान झाले आहे. या घटनेची गांभीर्याने दखल घेत ए.डी.जी.पी. हितेंद्र यांनी स्वतः बेळगाव येथे धाव घेतली आणि सीसीटीव्ही फुटेजच्या आधारे दोषी समाजकंटकांना शोधून त्यांच्यावर कठोर कारवाई करण्याचे आश्वासन दिले.

हत्तरगी टोलजवळ घडलेल्या या घटनेत आमच्या ११ कर्मचाऱ्यांवर हल्ला झाला असून, ४-५ सरकारी वाहनांसहित १० पेक्षा अधिक गाड्यांचे नुकसान झाले आहे, अशी माहिती ए.डी.जी.पी. यांनी दिली. “कोणताही अनुचित प्रकार घडू नये अशी आमची अपेक्षा होती, परंतु ही दुर्दैवी घटना घडली. त्यामुळे मी स्वतः रात्री बेळगाव येथे दाखल होऊन जखमी जवानांची विचारपूस केली,” असे त्यांनी नम्रपणे नमूद केले.

“शेतकऱ्यांच्या आंदोलनावेळी गोंधळ निर्माण झाल्यामुळे ही घटना घडली. आम्ही कोणालाही लाठीमार करण्याचे आदेश दिले नव्हते. आम्ही केवळ शेतकऱ्यांवर नियंत्रण मिळवण्याचा प्रयत्न करत होतो,” असे त्यांनी स्पष्ट केले.

या घटनेप्रकरणी यमकनमर्डी पोलीस ठाण्यात गुन्हा दाखल करण्यात आला आहे. तसेच, घटनास्थळाचे ४० ते ५० सीसीटीव्ही कॅमेऱ्यांमधील फुटेज तपासले जात आहेत. “समाजकंटकांनी हे कृत्य केले असावे या दृष्टीने आम्ही सर्व फुटेजची कसून तपासणी करत आहोत. अद्याप कोणालाही ताब्यात घेतले नाही. काही व्हिडिओंच्या पडताळणीनंतर आवश्यक ती पुढील कार्यवाही केली जाईल,” असे ए.डी.जी.पी. हितेंद्र यांनी प्रसारमाध्यमांना सांगितले. त्यांनी लवकरच घटनास्थळाला भेट देऊन पाहणी करणार असल्याचेही या वेळी नमूद केले.