बेळगाव शहरात बेकायदेशीर कृत्यांविरुद्ध पोलिसांनी मोहीम अधिक तीव्र केली आहे. ऑक्टोबर महिन्यात पोलिसांनी हानीकारक मांजा धाग्याच्या विक्रीवर तसेच जुगारावर स्वतंत्र छापे टाकून एकूण सात जणांविरुद्ध कायदेशीर कारवाई केली आहे.

पतंग उडवण्यासाठी वापरल्या जाणाऱ्या हानीकारक मांजा धाग्यामुळे वाहनचालक आणि नागरिकांच्या गळ्याला गंभीर दुखापत होण्याची शक्यता लक्षात घेऊन, शहरातील सर्व पोलीस अधिकाऱ्यांना या धाग्याच्या विक्रीवर कारवाई करण्याचे निर्देश देण्यात आले होते. या निर्देशानुसार मार्केट आणि एपीएमसी पोलीस ठाण्यांच्या हद्दीत छापे टाकण्यात आले. मार्केट पोलीस ठाण्याच्या हद्दीतील कोतवाल गल्ली येथील दुकानमालक फारुखअहमद गुलाबअहमद मुल्ला यांच्या दुकानातून मांजा धाग्याचे रोल जप्त करण्यात आले. तसेच, एपीएमसी पोलीस ठाण्याच्या हद्दीतील वैभव नगर येथील दुकानमालक जमीर कुतुद्दीन कशणट्टी यांच्यावरही कारवाई करत मांजा धाग्याचे रोल जप्त करण्यात आले आहेत.

एपीएमसी पोलीस ठाण्याच्या हद्दीतील आणखी एका कारवाईत, एपीएमसी मार्केट यार्ड बसस्थानकाजवळ सार्वजनिक ठिकाणी रोख रकमेचा पणाला लावून ‘अंदर बहार’ नावाचा जुगार खेळणाऱ्या पाच जणांना पोलिसांनी अटक केली आहे. एपीएमसी पोलीस ठाण्याचे पोलीस उपनिरीक्षक एस.आर. मुत्तत्ती आणि त्यांच्या कर्मचाऱ्यांनी छापा टाकून विनायक सोनरवाडी, सिद्धार्थ नागानूर, शिवानंद उगरखोडा, राजेंद्र सुतार आणि दशरथ पाटील या आरोपींना अटक केली.

या आरोपींकडून २०,१००/- रुपये रोख रक्कम आणि पत्त्यांची कॅट जप्त करण्यात आली आहे. आरोपींविरुद्ध एपीएमसी पोलीस ठाण्यात कर्नाटक पोलीस कायद्यान्वये गुन्हा दाखल करण्यात आला असून पुढील तपास सुरू आहे.

या दोन्ही यशस्वी कारवाया करणाऱ्या पोलीस निरीक्षक, पोलीस उपनिरीक्षक आणि कर्मचाऱ्यांच्या कार्याची पोलीस आयुक्त आणि पोलीस उपायुक्त यांनी प्रशंसा केली आहे.