जाती सर्वेक्षणाच्या कामावरून परतत असताना एका शिक्षिकेचा रस्त्यावरील अपघातात करुण अंत झाला. बागलकोट तालुक्यातील तिम्मापूर क्रॉसजवळ ही दुर्दैवी घटना घडली.

दानम्मा विजयकुमार नंदरगी (वय ५२) असे मृत शिक्षिकेचे नाव आहे. जाती सर्वेक्षण कामकाज संपवून त्या आपल्या मुलांसमवेत मोटारसायकलने घरी परतत असताना हा अपघात घडला.

गणनेच्या कामातील तांत्रिक समस्यांमुळे दोन-तीन दिवसांपासून शिक्षिका दानम्मा तणावात होत्या. त्यामुळे त्यांना घेऊन जाण्यासाठी मुलगा विकास मोटारसायकल घेऊन आला होता. मुलगा आणि आई येत असताना रस्त्याच्या खराब स्थितीमुळे मोटारसायकलचा तोल गेला आणि त्या घसरून खाली पडल्या, यातच त्यांचा मृत्यू झाला. मृत शिक्षिका मूळच्या विजापूर जिल्ह्यातील बसवन बागेवाडी तालुक्यातील वंदाल गावच्या होत्या. त्या बागलकोट तालुक्यातील रामपूर सरकारी आश्रय कॉलनी शाळेत सहशिक्षिका म्हणून कार्यरत होत्या. बागलकोटमध्ये वास्तव्य असल्याने गणना कार्य संपवून घरी परतत असताना हा अपघात झाला. याप्रकरणी बागलकोट ग्रामीण पोलीस ठाण्यात गुन्हा दाखल करण्यात आला आहे.