विजापूर जिल्ह्याच्या चडचण शहरातील एसबीआय बँकेतील दरोड्याप्रकरणी तपास करत असताना पोलिसांना मोठे यश मिळाले आहे. या दरोड्यामध्ये चोरीला गेलेले सोन्याचे दागिने आणि रोख रक्कम हुलजंती गावात एका जुन्या घराच्या छतावर लपवलेल्या बॅगेतून जप्त करण्यात आली आहे.

एका दरोडेखोराने ही बॅग घराच्या छतावर लपवून पळ काढला होता. स्थानिक गावकऱ्यांनी ही बॅग पाहिली आणि त्यांनी तात्काळ मंगळवेढा पोलिसांना याची माहिती दिली. महाराष्ट्र राज्यातील मंगळवेढा पोलिसांनी विजापूर जिल्ह्याचे पोलीस अधीक्षक लक्ष्मण निंबरगी यांना याबाबत कळवले. त्यानंतर पोलिसांनी ती बॅग ताब्यात घेऊन पुढील तपास सुरू केला.

या संदर्भात माहिती देताना पोलीस अधीक्षक लक्ष्मण निंबरगी यांनी सांगितले की, “या बॅगेत ६.५५ किलो सोन्याचे दागिने आणि ४१.४ लाख रुपये रोख रक्कम सापडली आहे. या सोन्याच्या दागिन्यांमध्ये १३६ पॅकेट्स होते. बँकेतून एकूण १.४ कोटी रुपयांचे सुमारे २० किलो सोन्याचे दागिने चोरीला गेले होते. त्यापैकी या बॅगेत २१ पॅकेट्समधील दागिने आणि १.३० लाख रुपये रोख रक्कम सापडली आहे.”

पोलीस अधीक्षकांनी पुढे सांगितले की, “१६ सप्टेंबर रोजी दरोड्याच्या दिवशी दरोडेखोरांनी वापरलेली इको गाडी हुलजंती गावात सापडली होती. ही गाडी एका बाईकला धडकली होती, त्यावेळी गाडीतील दरोडेखोराने पिस्तूल दाखवून पळ काढला होता. पळून जाताना त्याने सोन्याची दागिने आणि रोख असलेली बॅग एका घराच्या छतावर ठेवून पळ काढला.”

“या संपूर्ण प्रकरणाचा तपास सुरू असून, आमच्या विभागाची आठ पथके या प्रकरणाचा तपास वेगवेगळ्या दृष्टीकोनातून करत आहेत,” असे ते म्हणाले. एसबीआय बँक दरोड्याचे हे प्रकरण लवकरच सोडवून दरोडेखोरांना अटक केली जाईल, असेही त्यांनी सांगितले.