केंद्राने केलेली जीएसटी कपात म्हणजे फार मोठे यश नाही, आमदार सवदींचा निशाणा

केंद्र सरकारने केलेल्या जीएसटी कपातीवरून माजी उपमुख्यमंत्री आणि आमदार लक्ष्मण सवदी यांनी उत्तर कर्नाटकच्या शैलीत म्हैस विकण्याच्या उदाहरणावरून भाजपवर टीका केली आहे.

बेळगाव जिल्ह्यातील अथणी येथे बोलताना आमदार लक्ष्मण सवदी म्हणाले की, केंद्र सरकारने जीएसटी कमी केल्यामुळे काही लोक स्वतःचीच पाठ थोपटून घेत आहेत. ही भाजपच्या लोकांनी केलेल्या चुका सुधारण्याचा एक छोटासा प्रयत्न आहे, त्यापेक्षा जास्त काही नाही. जीएसटी कमी करणे हे काही फार मोठे यश नाही. त्यांनी फक्त लोकांवर लादलेले ओझे कमी केले आहे.

भाजपच्या लोकांना आपली चूक कळली, म्हणून त्यांनी जीएसटी कमी केली. यात अभिमान वाटण्यासारखे काहीही नाही. सुरुवातीला जीएसटी दर अवैज्ञानिक पद्धतीने ठरवण्यात आले होते. आता जीएसटीचा दर खूप जास्त ठरवून तो कमी करण्यात आला आहे, अशाच प्रकारे आमच्याकडे म्हशींचा व्यापार करतात, अशा शब्दांत आमदार लक्ष्मण सवदी यांनी भाजपवर टीका केली.