महाराष्ट्राच्या घाटमाथ्यावर सुरू असलेल्या मुसळधार पावसामुळे रायबाग तालुक्यातून वाहणाऱ्या कृष्णा नदीच्या पाणीपातळीत अचानक वाढ झाली आहे. त्यामुळे रायबाग तालुक्यातील बावनसौंदत्ती येथील सुगंधादेवी मंदिर पाण्याखाली गेले आहे.

कर्नाटक आणि महाराष्ट्रातील भाविकांचे श्रद्धास्थान असलेल्या सुगंधादेवी मंदिरात पाणी शिरल्याने येथील सर्व पूजा-अर्चा पूर्णपणे थांबली आहे. त्यामुळे भाविकांना लांबूनच देवीचे दर्शन घ्यावे लागत आहे. महाराष्ट्राच्या घाटमाथ्यावरील पावसाचे प्रमाण थोडे कमी झाले असले, तरी महाराष्ट्रातील धरणांमधून पाणी सोडले जात असल्यामुळे नदीच्या पाण्याची पातळी वाढली आहे. रायबाग तालुका प्रशासनाने खबरदारीचा उपाय म्हणून लोकांना नदीकाठी जाण्यापासून रोखण्यासाठी कडक बंदोबस्त ठेवला आहे.